सुकुमबासीको विवरण किन मागियो? सेनाको यस्तो जवाफ

काठमाडौँ- नेपाली सेनाले सम्भावित जोखिम नक्सांकन गर्नका लागि तथ्यांक अद्यावधिक गर्ने कार्य गरिएकाले सुकुमबासीको विवरण माग गरिएको जनाएको छ। सेनाले आज (बुधबार) एक विज्ञप्ति जारी गर्दै सेनाका स्थानीय युनिटहरूले आ-आफ्नो जिम्मेवारी क्षेत्रमा हुन सक्ने विपद्का घटनाहरूमा सुरक्षा फौजन तैनाथ भई उद्धार, राहत वितरण र पुनर्स्थापना कार्यहरूलाई सहज बनाउने उद्देश्यले विवरण माग गरिएको जनाएको हो।

सुकुमबासीहरूको विवरण माग गरेको विषयलाई लिएर विभिन्न सञ्चारमाध्यम तथा सामाजिक सञ्जालहरूमा सेनाको आलोचना भएको थियो।

सेनाले वर्षातको समयमा बाढी, पहिरो, डुबान र नदी कटानबाट हुन सक्ने जोखिमलाई दृष्टिगत गरी सरोकारवाला निकायहरुसँग समन्वय र सहकार्य गर्दै मानवीय भौतिक क्षति न्यूनीकरणका लागि विपद् पूर्वतयारीको योजना गर्दै आएको पनि जनाएको छ।