हिमाल प्रेस 
अविरल वर्षाका कारण भासिएको जोमसोम–कागबेनी सडक। जोमसोमदेखि मुक्तिनाथ र जोमसोमदेखि कोरलानाका जाने सवारीसाधन सडक भासिदा जोमसोममै रोकिएका छन्। तस्बिर:सुन्दरकुमार थकाली/रासस
मुस्ताङ- अविरल वर्षासँगै जोमसोम-कोरला सडकखण्डको आधा दर्जन ठाउँमा पहिरोले क्षति पुर्याएको छ। जोमसोमदेखि कागबेनी र कागबेनीदेखि छुसाङसम्मको विभिन्न ठाउँमा पहिरो खस्दा यातायात सेवा अवरुद्ध बनेको जिल्ला प्रशासन कार्यालय मुस्ताङले जनाएको छ।
जोमसोम-कागबेनी सडकअन्तर्गत जोमसोमदेखि कागबेनी जाने पाण्डा खोला नजिकको तीन स्थानमा पहिरोले सडकमा क्षति पुगेको मुस्ताङका प्रमुख जिल्ला अधिकारी विष्णुप्रसाद भुसालले जानकारी दिए।
जोमसोमदेखि दुई किलोमिटरमाथिको कालोपत्र सडक भासिएर जोखिम बढेको छ। निरन्तरको वर्षाले जोमसोमदेखि केहीमाथि करिब २५ मिटर सडक भासिन पुगेको प्रमुख जिल्ला अधिकारी भुसालले बताए।
बिहीबार साँझ पाण्डा खोलाको बाढीले सडकमा क्षति पुर्याएको छ। यद्यपि सुरक्षा नियकायले हाललाई कामचलाउ रूपमा भए पनि यातायात सञ्चालनमा ल्याएको उनको भनाइ छ।
जोमसोम-कागबेनी सडकखण्डको चार स्थानमा सडक माथिबाट पहिरो खस्नेक्रम जारी रहेकाले जोमसोमदेखि कागबेनी जाने मुक्तिनाथ दर्शनार्थीलाई जोमसोममै रोकिएको छ। ‘मुक्तिनाथ-जोमसोम सडकका विभिन्न ठाउँमा पहिरो खस्नेक्रम जारी छ, हामीले माथि रोकिएका सवारी तथा यात्रुलाई एकतर्फी सडक खुलाएर भए पनि तल झाने प्रयास गरिरहेका छौँ’,प्रमुख जिल्ला अधिकारी भुसालले भने,‘जोमसोमबाट मुक्तिनाथ र कोरलातर्फ जाने सवारीसाधनलाई माथि जान रोक लगाएका छौँ।’
प्रमुख जिल्ला अधिकारी भुसालले वर्षा रोकिएमा सडकको अवस्था हेरेर मात्रै यातायात चल्न दिने बताए। यसैगरी जोमसोम-कागबेनी सडकमा पहिरो खस्दा एक सार्वजनिक भाडाको ट्याक्सीमा क्षति पुगेको छ भने पहिरो गएको स्थानमा एक भारतीय कार फसेर बसेको जिल्ला प्रहरी कार्यालय मुस्ताङका प्रहरी नायब उपरीक्षक छिरिङ किप्पा लामाले जानकारी दिए। पहिरोका कारण फसेको भारतीय गाडीलाई निकाल्ने प्रयास भइरहेको उनको भनाइ छ।
बाढीपहिरोले कागबेनी-छुसाङ सडकखण्डको आधा दर्जन स्थानको सडक अवरुद्ध भएको छ। ताङ्वे-छुसाङबीचमा पर्ने खोलाको बाढीले कोरला सडकमा क्षति पुर्याएको बारागुङ मुक्तिक्षेत्र गाउँपालिका-३ का अध्यक्ष विनोद गुरुङले जानकारी दिए। उनका अनुसार कागबेनी-कोरला सडक बिहीबार साँझदेखि पूर्णरूपमा अवरुद्ध छ।
वर्षाका कारण सडक अवरुद्ध भए अलपत्र १७ जना यात्रीहरूलाई बारागुङ-३ स्थित ग्रीन ताङ्वे घरमा लगेर राखिएको वडाध्यक्ष गुरुङले बताए। वर्षा रोकिएपछि उनीहरूलाई गाउँले बस्ती नजिक ल्याउने योजना रहेको बताए।
अवरुद्ध जोमसोम-कागबेनी सडकको शुक्रबार बिहान प्रमुख जिल्ला अधिकारी विष्णुप्रसाद भुसाल, सशस्त्र प्रहरी नायब उपरीक्षक भेषराज गिरी र प्रहरी नायब उपरीक्षक छिरिङ किप्पा लामालगायतका सुरक्षाकर्मीले अवलोकन गरे। जोमसोम-कागबेनी भासिएको सडक मर्मत गरी सञ्चालनमा ल्याउन दुई-तीन दिन लाग्नसक्ने जिल्ला प्रशासन कार्यालय मुस्ताङले जनाएको छ।
