सुर्खेतमा बस र ट्रक ठोक्किँदा एक जनाको मृत्यु, ६ घाइते

सुर्खेत- सुर्खेतमा बस र ट्रक ठोक्किँदा बिहीबार एक जनाको मृत्यु भएको छ। ६ जना घाइते भएका छन्। रत्नराजमार्गस्थित भेरीगंगा नगरपालिकाको सत्तरी भन्ने ठाउँमा नेपालगञ्जबाट सुर्खेततर्फ आउँदै गरेको बस र विपरीत दिशातर्फ जाँदै गरेको ट्रक एकआपसमा ठोक्किएका हुन्।

मृत्यु हुनेमा ट्रक चालक दैलेखको गुराँस गाउँपालिका-१ का ३१ वर्षका हिरा पुन रहेको जिल्ला ट्राफिक प्रहरी कार्यालय सुर्खेतका प्रमुख वकिल सुनारले जानकारी दिए। उनका अनुसार ट्रक चालकको उपचारको क्रममा प्रदेश अस्पतालमा मृत्यु भएको हो।

ना ४ ख ६२६३ नम्बरको बस र कर्णाली प्रदेश ०२००१ क ००४८ नम्बरको ट्रक एकआपसमा ठोक्किएका हुन्। घाइतेहरूको प्रदेश अस्पताल र माया नर्सिङ होममा उपचार भइरहेको प्रहरीले जनाएको छ।