हिमाल प्रेस 
काठमाडौँ- विभिन्न मुलुकका लागि नियुक्त भएका चार नेपाली राजदूतले बुधबार राष्ट्रपति रामचन्द्र पौडेलसमक्ष शपथ लिएका छन्।
राष्ट्रपति कार्यालय शीतल निवासमा आयोजित एक समारोहमा सुधीर भट्टराई, तेजबहादुर क्षेत्री, घनश्याम लम्साल र रामप्रसाद सुवेदीले राजदूतको शपथ लिएका हुन्।
भट्टराई फ्रान्स, क्षेत्री संयुक्त अरब इमिरेट्स, लम्साल कुवेत र सुवेदी स्वीट्जरल्यान्डका लागि राजदूत नियुक्त भएका छन्।
शपथ समारोहमा कानुन, न्याय तथा संसदीय मामिला मन्त्री धनराज गुरुङलगायत सरकारका उच्च पदस्थ अधिकारीहरूको उपस्थिति रहेको राष्ट्रपति कार्यालयले जनाएको छ।
राजदूतमा ६ जना सिफारिस भएका थिए। लोकबहादुर थापालाई न्युयोर्कको स्थायी प्रतिनिधिमा नियुक्त गरिएको थियो। उनले शपथ लिएर न्युयोर्क पुगिसकेका छन्।
थाइल्याण्डको अग्रिमा आउन बाँकी भएकाले धनबहादुर ओलीको नियुक्ति बाँकी छ।
प्रकाशित: १० असोज २०८० २०:२६
प्रतिक्रिया
