उदयपुरका ७४ वर्षे बेगबहादुरले गरे भत्ता नलिने घोषणा

उदयपुर– उदयपुरको कटारी नगरपालिका ११ का ७४ वर्षीय बेगबहादुर सुनुवारले सामाजिक सुरक्षा भत्ता नलिने घोषणा गरेका छन्। आफू आफ्नै मेहनतको कमाइ मात्रै खाने बताउँदै सुनुवारले भत्ता नलिने घोषणा गरेका हुन्।

एक छोरीको साथमा बस्दै आएका सुनुवारको मुख्य पेशा कृषि कर्म हो। अरूको केही पनि नलिने र नखाने स्वाभावका सुनुवारले भत्ता नलिने बताएका हुन्। ‘उहाँले भत्ता लिन मान्नु भएन र नलिने घोषणा गर्नुभयो,’ वडाध्यक्ष अनन्त हायुले भने, ‘अरूले दिएको नखाने भन्दै उहाँले भत्ता नलिने हुनुभएको हो।’

हायुकाअनुसार राज्यले दिएको भत्ता नलिने घोषणा गर्दै सुनुवारले राज्यबाट निःशुल्क भत्ता नलिने बताएका हुन्। सुनुवारले भत्ता नलिने घोषणा गरेको जानकारी नगरपालिकालाई गराइसकेको बताउँदै वडाध्यक्ष हायुले वडाबाट विशेष सम्मान गर्ने तयारी गरेको जनाए।