हिमाल प्रेस 
काठमाडौँ– वीरगञ्ज महानगरपालिका क्षेत्रभित्र नेपाल खानेपानी संस्थानले ठूलो क्षमताको पानी ट्यांकी निर्माण गर्न लागेको छ। बढ्दो गर्मीका कारण चापाकललगायत खानेपानीका मुहानमा पानी आउन छाडेपछि संस्थानले साढे ४ लाख लिटर क्षमताको पानी ट्यांकी निर्माण गर्न लागेको हो।
महानगरपालिकाको वडा १६ स्थित नगवामा निर्माण हुन लागेको खानेपानी पानी ट्यांकीको जनता समाजवादी पार्टी, नेपाल (जसपा) का प्रमुख सचेतक प्रदीप यादव र मेयर राजेशमान सिंहले संयुक्त रूपमा शनिबार (आज) शिलान्यास गरे। सो पानी ट्यांकीले वडा नम्बर १५ र १६ का लगभग ४५ हजार घरधुरी लाभान्वित हुने नेपाल खानेपानी संस्थानका प्रमुख निरन महर्जनले जानकारी दिए।
निर्वाचन क्षेत्र १ का प्रतिनिधिसभा सदस्यसमेत रहेका जसपाका प्रमुख सचेतक यादवले पानी ट्यांकी निर्माणले वडावासीले भोगिरहेको खानेपानीको समस्या समाधान हुने विश्वास व्यक्त गरे। पछिल्लो समय जलवायु परिवर्तन र बढ्दै गएको तापक्रमका कारण जमिनमुनिको पानीको सतह घट्दै जाँदा चापाकलमासमेत पानी आउन छाडेपछि वर्तमान मागलाई सम्बोधन गर्न पानीट्यांकी निर्माणको काम सुरु गरिएको उनको भनाइ छ।
जलवायु परिवर्तन र विभिन्न कारणले जमिनमुनि रहेको पानीको सतह तल झर्दै गइरहेको उल्लेख गर्दै उनले रुख रोप्ने र घरघरमै वाटर रिचार्जको उपाय अपनाउनुपर्नेमा जोड दिए।
मेयर सिंहले तराई-मधेसका क्षेत्रमा देखिएको पानीको समस्या गम्भीर भएको उल्लेख गरे।
महानगरभित्र देखिएको खानेपानीको समस्या समाधानका लागि नेपाल खानेपानी संस्थानसँग मिलेर महानगरका विभिन्न वडामा ४ हजार धारा निःशुल्क रूपमा जडान गर्न लागिएको उनले जनाए। महानगरपालिकाले नेपाल खानेपानी संस्थानसँग समन्वय गरेर ४ हजार घरधुरीमा निःशुल्क धारा जडान गरिने मेयर सिंहको भनाइ छ।
संघीय सरकारको सहयोगमा नेपाल खानेपानी संस्थानले वीरगञ्ज जलापूर्ति परियोजनाअन्तर्गत कूल लागत ५३ करोड ३२ लाख २४ हजार २ सय २० को लागतमा सो पानीट्यांकी निर्माण गर्न लागिएको खानेपानी संस्थानका प्रमुख महर्जनले बताए । परियोजना २ वर्षमा सम्पन्न हुने लक्ष्य लिइएको छ।
२ सातादेखि बढ्दो गर्मीका कारण सतहको पानी तल झर्दै गएर चापाकलमा पानी आउन छाडेपछि पर्साको ग्रामीण क्षेत्रमा खानेपानीको हाहाकार हुँदै गएको छ। पर्साको वीरगञ्ज महानगरपालिकाका ग्रामीण क्षेत्रसहित २ दर्जन गाउँमा खानेपनीको संकट बढ्दै गएको स्थानीयले बताएका छन्।
