हिमाल प्रेस 
प्रतिनिधिमूलक तस्बिर
सुर्खेत– सुर्खेतमा ५ जनामा दादुरा देखा परेको छ। ६५ शंकास्पद बिरामीको चेकजाँच गर्दा उनीहरूमा दादुरा भेटिएको हो। वीरेन्द्रनगर र चिंगाड २/२ तथा गुर्भाकोटका एक जनामा दादुरा भेटिएको स्वास्थ्य सेवा कार्यालय सुर्खेतका प्रमुख गणेशभक्त गौतमले जानकारी दिए। उनका अनुसार कालीकोटमा पनि ३ जनामा दादुरा देखिएको छ।
आइतबारदेखि सुर्खेतका ९ वटै पालिकामा दादुराविरुद्धको खोप अभियान सुरु गरिने भएको छ। २ चरणमा सञ्चालन हुने उक्त खोप अभियन आगामी असार ५ गतेसम्म सञ्चालन गरिने छ।
पहिलो चरणमा बराहाताल, चिंगाड, भेरीगंगा र लेकबेँसी तथा दोस्रो चरणमा वीरेन्द्रनगर चौकुने, सिम्ता, पञ्चपुरी र गुर्भाकोटमा खोप अभियान सञ्चालन गरिने गौतमले बताए।
यसैबीच दादुरा रुबेल खोप अभियान सञ्चालनसम्बन्धी जिल्ला खोप समन्वय समिति, सञ्चारकर्मी र सरोकारवालाको अभिमुखीकरण गरिएको छ।
कार्यक्रममा बोल्दै जिल्ला समन्वय समितिका प्रमुख गंगाराम सुनारले वडाले प्रभावकारी भूमिका खेल्नुपर्नेमा जोड दिए। अभियान सफल बनाउन सरकारको धेरै लगानी भएको उल्लेख गर्दै उनले गुणस्तरीय र प्रभावकारी समन्वय आवश्यक पर्ने उल्लेख गरे।
कर्णाली प्रदेश स्वास्थ सेवा कार्यक्रमका निर्देशक डा. रविन खड्काले खोप अभियानलाई प्रभावकारी बनाउन स्थानीय तह र प्रचारप्रसारमा विशेष ध्यान दिनुपर्ने बताए। खोप लगाउनका लागि हरेक खोप केन्द्रमा २ स्वास्थ्यकर्मी र २ स्वयंसेवक खटाइने छ।
खोप अभियानका लागि जिल्लाका ९९ वडामा कूल ५ सय ४७ खोप केन्द्रको व्यवस्था गरिएको छ। खोप केन्द्र विद्यालयमा राखिने छ। दादुराविरुद्धको खोप १५ वर्षमुनिका बालबालिकालाई दिइने छ। यसअघि सुर्खेतलाई पूर्ण खोपयुक्त जिल्ला घोषणा गरिएको थियो।
सन् २०२३ सम्म दादुरामक्त नेपाल घोषणा गर्ने भनिएकामा संक्रमण फैलिएपछि सो लक्ष्यलाई सन् २०२६ सम्म पुर्याइएको छ।
