हिमाल प्रेस 
बागलुङ– बागलुङको गलकोट क्षेत्रमा कोही बिरामी पर्नासाथ बागलुङ, पोखरा र काठमाडौँका अस्पतालमा पुर्याइन्थ्यो। यहाँ स्वास्थ्य संस्था नभएर होइन, नागरिकले विश्वास नगर्दा गलकोटस्थित प्राथमिक स्वास्थ्य केन्द्र, स्वास्थ्यचौकी तथा अन्य स्वास्थ्य संस्थामा बिरामी कम जान्थे। तर पछिल्लो केही महिनायता बिरामी पर्दाबित्तिकै गलकोट बाहिर जानेको संख्या कम भएको छ।
गलकोट नगरपालिकाले पुस महिनादेखि नगर अस्पताल सञ्चालनमा ल्याएपछि जिल्ला बाहिर जाने बिरामीले यही उपचार गराउन थालेका छन्।
पछिल्लो समय नगर अस्पतालमा नागरिकको विश्वास बढ्दै गएको छ। अस्पतालमा विशेषज्ञ सेवा सुरु भएपछि बिरामीको संख्या पनि दिनदिनै बढ्दै गएको छ। नगरकार्यपालिकाको पुस १७ को निर्णयानुसार वडा ५ को हरिचौरमा नगर अस्पताल सञ्चालनमा आएपछि दुर्गम गाउँका बिरामीले पनि विशेषज्ञ सेवा पाएका छन्।
हाल अस्पतालमा एक जना विशेषज्ञ चिकित्सक १ जना मेडिकल अधिकृत, नर्सिङ ६, हेल्थ असिस्टेन्ट २, नर्स ३, अहेव ३, अनमी ३, रेडियोक्राफर १, डेल्टलहाइजेनिस्ट १, ल्याब टेक्निसिएन १, ल्याब असिस्टेन्ट १, कार्यालय सहयोगी ५ र १ जना एम्बुलेन्स चालक रहेका छन्।
नगरपालिकाले गलकोट प्राथमिक स्वास्थ्य केन्द्रलाई स्तरोन्नति गरी १५ शय्याको नगर अस्पताल बनाएको हो। अहिले अस्पतालमा विशेषज्ञ डा. राजेश पौडेल र डा. मनोज कार्कीले सेवा दिइराख्नुभएको छ। नगर अस्पताल प्रमुख डा. राजेश पौडेलले पहिलेको तुलनामा बिरामीको संख्या बढिरहेको बताए।
आफू माघ महिनामा आएको सुनाउँदै त्यसयता धेरै दीर्घ तथा अन्य रोगका बिरामीले सेवा लिएको बताए। सेवालाई प्रभावकारी बनाउन र घर आँगनकै अस्पतालबाट गुणस्तरी सेवा दिन अस्पताल प्रशासन गम्भीर बनेर लागेको उनको भनाइ छ।
‘०१६ मा स्थपाना भएको स्वास्थ्य केन्द्र अहिले नगर अस्पतालमा स्तरवृद्धि भएको छ। हामीप्रति नारिककको विश्वास बढ्दै गएको छ, यहाँका चिकित्सक कर्मचारीले नागरिकको विश्वास जित्ने गरी काम गर्ने कोसिस गरिरहेका छौं। पहिलेका सेवालाई गुणस्तरीय र प्रभावकारी बनाउँदै गएका छौं, केही उपकरणको अभाव छ, त्यसलाई पनि प्रदेश सरकारसँग माग गरेर परिपूर्ति गर्ने तयारीमा छौं,’ उनले भने।
पहिले मासिक ३ सय ५० बिरामी आउने गरेको अस्पतालमा अहिले एकै दिन एक सय ५० बढी बिरामीले सेवा लिने गरेको अस्पतालले जनाएको छ। अहिले अस्पतालमा चौबीसै घण्टा इमर्जेन्सी सेवा, भिडियो एक्सेर, पोष्टमार्टम, प्रसूति सेवा, डिभियो एक्सरे, दन्तरोगको उपचारलगायतका सेवा प्रभावकारी भइरहेका छन्।
अस्पतालमा एक एमडीजिपी (जनरल फिजिसिन) र एक एमबीबीएस डाक्टरले सेवा दिन थालेपछि बिरामी पोखरा, काठमाडौँ जानुपर्ने समस्याबाट मुक्त भएको गलकोट नगरपालिका–५ का अध्यक्ष पवन हमालले बताए।
उनले पछिल्लो समय गलकोट नगरपालिकाबाहेक ताराखोला गाउँपालिका, बरेङ गाउँपालिका, बडिगाड गाउँपालिका, गुल्मीको मुसिकोट नगरपालिकालगायतबाट बिरामी आउन थालेको बताए।
अस्पताल व्यवस्थापन गर्नका लागि नगरपालिकाको आन्तरिक स्रोत र प्रदेश सरकारबाटै सहयोग भइरहेको अध्यक्ष हमालले बताए। ‘नगर अस्पताल सञ्चालनमा आएपछि धेरै नागरिकलाई सहज भएको छ,’ अध्यक्ष हमालले भने, ‘पहिला बिरामीलाई भर्ना गरेर राख्ने व्यवस्था थिएन, अहिले यही राखेर उपचार गरिन्छ।’
स्थानीय सुनिल विकले नगर अस्पताल सञ्चालनमा आएपछि गरिब नागरिकले सहज रूपमा स्वास्थ्य सेवा पाउन थालेको बताए। पहिले गाउँमा कोही बिरामी हुँद ऋण खोजेर पोखरा काठमाडौँ पुर्याउने गरेको भन्दै अहिले गाउँनजिकैको अस्पतालमा उपचार गराउन पाउँद खुसी लागेको उनले सुनाए।
यहाँका स्वास्थ्यचौकी तथा स्वास्थ्य संस्थामा पहिले सामान्य उपचारसमेत नहुने गरेको भन्दै अहिले विशेषज्ञ चिकित्सकबाट जाँच र उपचार गराउन पाएको विकले बताउनुहुन्छ। नगर अस्पतालबाट गुणस्तरीय सेवा प्रदानसँगै चालु आर्थिक वर्षदेखि ज्येष्ठ नागरिकको स्वास्थ्य परीक्षण र उपचार उनीहरूको घर–घर पुगेर गर्न थालेको नगरपालिकाका प्रवक्ता हिम भण्डारीले जानकारी दिए।
नगरपालिकाभित्रका ६० वर्षमाथिका ज्येष्ठ नागरिकको सहजताका लागि घरमै पुगेर स्वास्थ्य परीक्षण तथा औषधि उपलब्ध गराउन थालेको भण्डारीले जनाए। ज्येष्ठ नागरिक अस्पताल पुग्न समस्या हुने हुँदा नगरपालिकाले यो व्यवस्था गरेको उनको भनाइ छ। -रासस
