हिमाल प्रेस 
नेपाल पर्यटन बोर्ड। फाइल तस्बिर
काठमाडौँ- नेपाल पर्यटन बोर्डले आर्थिक वर्ष २०८३/८४ का लागि आफ्नो वार्षिक बजेट ६.९१ प्रतिशतले बढाएर एक अर्ब ७० करोड रुपैयाँ पुर्याएको छ। अघिल्लो आर्थिक वर्षमा विनियोजित बजेटको ५६ प्रतिशत मात्रै खर्च भएको अवस्थामा बोर्डले चालु आर्थिक वर्षका लागि करिब ११ करोड रुपैयाँले बजेट बढाएको हो।
बोर्डले आर्थिक वर्ष २०८२/८३ का लागि एक अर्ब ५९ करोड रुपैयाँ बजेट विनियोजन गरेको थियो। उक्त अवधिमा ८९ करोड ४७ लाख ६० हजार रुपैयाँ अर्थात् कुल बजेटको ५६ प्रतिशत मात्रै खर्च गर्न सकेको थियो।
कम खर्च भए पनि बोर्डले चालु आर्थिक वर्षको बजेट करिब ११ करोड रुपैयाँ बढाएको हो।
बोर्डका अधिकारीहरूले अघिल्लो वर्ष कम बजेट खर्च हुनुको मुख्य कारण वित्तीय विनियमावली स्वीकृत हुन भएको ढिलाइलाई बताएका छन्। आर्थिक वर्ष सकिन तीन महिना मात्रै बाँकी रहँदा विनियमावली स्वीकृत भएकाले केही अन्तर्राष्ट्रिय बजार प्रवर्द्धन तथा प्रचार कार्यक्रम प्रभावित भएको उनीहरूको भनाइ छ।
आर्थिक वर्ष २०८२/८३ मा बोर्डले कर्मचारी खर्चतर्फ विनियोजित बजेटको ७४ प्रतिशत र कार्यालय सञ्चालनतर्फ ५३ प्रतिशत खर्च गरेको थियो। पर्यटन बजार व्यवस्थापन तथा प्रवर्द्धन शीर्षकमा भने ७७ प्रतिशत खर्च भएको थियो। उक्त शीर्षकमा ४३ करोड ६१ लाख रुपैयाँ विनियोजन गरिएकामा ३३ करोड ७ लाख ९० हजार रुपैयाँ खर्च भएको थियो।
अन्य केही शीर्षकमा भने खर्च ५० प्रतिशतभन्दा पनि कम रहेको थियो। उदाहरणका लागि, प्रदेश कार्यालय स्थापना गर्न विनियोजन गरिएको ११ करोड १२ लाख रुपैयाँमध्ये एक रुपैयाँ पनि खर्च हुन सकेन।
बोर्डको हाल गण्डकी प्रदेशमा मात्रै एउटा प्रदेश कार्यालय छ। उक्त कार्यालय पोखरामा छ, जुन नेपालको प्रमुख पर्यटन गन्तव्यका रूपमा रहेको छ।
आर्थिक वर्ष २०८३/८४ को बजेटमा बोर्डले कर्मचारी खर्चका लागि १५ करोड ६३ लाख १० हजार र कार्यालय सञ्चालनका लागि १० करोड २१ लाख ५० हजार रुपैयाँ विनियोजन गरेको छ।
बोर्डको कुल खर्चको ठूलो हिस्सा अन्तर्राष्ट्रिय बजार प्रवर्द्धन तथा प्रचारमा जाने गरेको छ। यस वर्ष कार्यक्रम खर्चका लागि एक अर्ब ३२ करोड रुपैयाँ अर्थात् कुल बजेटको ७८ प्रतिशत विनियोजन गरिएको छ। त्यस्तै, पदयात्री सूचना व्यवस्थापन प्रणाली(टिम्स) का लागि २० करोड ३९ लाख रुपैयाँ अर्थात् कुल बजेटको १२ प्रतिशत छुट्याइएको छ।
बोर्डले विशेष प्रवर्द्धनात्मक कार्यक्रमका लागि २९ करोड रुपैयाँ विनियोजन गरेको छ। यसमध्ये वेलनेस इयर २०२७ अभियानका लागि १८ करोड, डिजिटल प्रवर्द्धन अभियानका लागि पाँच करोड, इन्फ्लुएन्सर सम्मेलनका लागि चार करोड, सगरमाथा सफाइ अभियानका लागि एक करोड र नेपाल भ्रमण वर्ष २०८५ को तयारीका लागि एक करोड रुपैयाँ छुट्याइएको छ।
बोर्डले आर्थिक वर्ष २०८३/८४ मा आफ्नो प्रमुख आम्दानीको स्रोतका रूपमा रहेको पर्यटन सेवा शुल्कबाट १ अर्ब १७ करोड रुपैयाँ आम्दानी हुने अपेक्षा गरेको छ। त्यस्तै, टिम्स शुल्कबाट ४ करोड ६६ लाख ५० हजार र अन्य स्रोतबाट तीन करोड ४३ लाख ६० हजार रुपैयाँ आम्दानी हुने अनुमान गरेको छ।
अन्तर्राष्ट्रिय हवाई टिकटमा टीएसएफ लगाइन्छ। हाल त्रिभुवन अन्तर्राष्ट्रिय विमानस्थलबाट बाहिरिने प्रत्येक यात्रुबाट बोर्डले मूल्य अभिवृद्धि कर (भ्याट)सहित एक हजार एक सय ३० रुपैयाँ पर्यटन सेवा शुल्क उठाउँदै आएको छ।
