रसुवा बाढी अपडेट : १,३५७ जनाको मृत्यु, ५,३२६ बेपत्ता

काठमाडौँ- रसुवाको भोटेकोशी-त्रिशूली नदीमा यही भदौ १० गते आएको भीषण बाढीबाट हालसम्म १ हजार ३५७ जनाको मृत्यु भएको छ भने ५ हजार ३२६ जना सम्पर्कविहीन रहेको सरकारी तथ्यांक सार्वजनिक भएको छ।

गृह मन्त्रालयअन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ मंगलबार अपराह्न १ बजेसम्मको खोज, उद्धार तथा राहतसम्बन्धी अद्यावधिक विवरण सार्वजनिक गर्दै बाढीबाट भएको मानवीय क्षतिको उक्त तथ्यांक सार्वजनिक गरेको हो।

प्राधिकरणका अनुसार रसुवामा १६९, नुवाकोटमा १९७, धादिङमा ७०, गोरखामा ७५, तनहुँमा ३८, चितवनमा ३६३, नवलपरासी पूर्वमा २२३ र नवलपरासी पश्चिममा २२२ वटा शव फेला परेका छन्। तीमध्ये हालसम्म १०२ शवको सनाखत गरी आफन्तलाई बुझाइएको छ।

बेपत्ता हुनेमा रसुवाबाट मात्रै २ हजार ८६० जना रहेका छन्। त्यसमध्ये रसुवाका १ हजार ३९३, अन्य जिल्लाका १ हजार २८६, नेपाली सेनाका ४५, नेपाल प्रहरीका २५, सशस्त्र प्रहरीका १२, सरकारी कर्मचारीका ७३ तथा बैंक तथा वित्तीय संस्थाका २६ जना छन्।

नुवाकोट जिल्ला प्रशासन कार्यालयबाट प्राप्त विवरणअनुसार करिब १ हजार ९८१ नेपाली नागरिक सम्पर्कविहीन छन्। त्यस्तै, करिब ५८७ विदेशी पर्यटक पनि सम्पर्कविहीन रहेको प्राधिकरणले जनाएको छ। कूल सम्पर्कविहीनको संख्यामा सनाखत भएका १०२ शवको संख्या घटाइएको जनाइएको छ।

विपद्का बीच हालसम्म १३ हजार ५८३ जनाको उद्धार गरिएको छ। बाढीबाट घाइते भएका ६ हजार ८२७ जनाको उपचार गरिएको छ।

विभिन्न १० अस्पतालमा ३२७ जनाको उपचार भइरहेकामा २४२ जना डिस्चार्ज भइसकेका छन्। नेपाली सेनाले ३ हजार ४०४ तथा सशस्त्र प्रहरी बलले ३ हजार ९६ जना घाइतेको उपचार गरेको प्राधिकरणको विवरणमा उल्लेख छ।

प्रभावित क्षेत्रमा मनोसामाजिक सहयोगका लागि स्वास्थ्य मन्त्रालयमार्फत १५० भन्दा बढी जनशक्ति परिचालन गरिएको छ। बाढी प्रभावितका लागि ३९ वटा होल्डिङ सेन्टर सञ्चालनमा छन्। ती केन्द्रमा रसुवामा ६६९, नुवाकोटमा २ हजार ६५१ र धादिङमा २१३ गरी कुल ३ हजार ५३३ जना बसोबास गरिरहेका छन्।

खोज, उद्धार तथा सुरक्षाका लागि नेपाल प्रहरी, नेपाली सेना र सशस्त्र प्रहरी गरी २१ हजार ४०२ जना सुरक्षाकर्मी परिचालन गरिएको छ। नेपाल प्रहरीका ७ हजार ९१२, नेपाली सेनाका ९ हजार २८७ र सशस्त्र प्रहरी बलका ४ हजार २०३ जना जनशक्ति प्रभावित क्षेत्रमा खटिएका छन्।

उद्धार तथा राहत सामग्री ढुवानीका लागि हवाई उडानसमेत निरन्तर भइरहेको छ। नेपाली सेनाले हालसम्म १ हजार १५७ पटक, निजी क्षेत्रका हेलिकप्टरले काठमाडौँबाट १२९ पटक तथा सशस्त्र प्रहरीले प्रभावित क्षेत्रमा २०३ पटक उडान भरेका छन्। भदौ २२ गते मात्रै दुई हेलिकप्टरमार्फत खाद्यान्न तथा बन्दोबस्तीका सामग्री र आठ मिनी ट्रकमार्फत खाद्यान्न तथा गैरखाद्य सामग्री प्रभावित क्षेत्रमा पठाइएको थियो।

सरकारले प्रभावित जिल्लामा नगद राहतका लागि रसुवालाई १ करोड, नुवाकोटलाई १ करोड र धादिङलाई ५० लाख रुपैयाँ विनियोजन गरेको छ। त्यस्तै, प्रभावित १५ पालिकाका लागि १३ करोड ५० लाख रुपैयाँ उपलब्ध गराइएको छ।

प्रभावित क्षेत्रमा डिजेल ५० हजार लिटर, पेट्रोल १८ हजार लिटर र हवाई इन्धन १८ हजार लिटर मौज्दात रहेको प्राधिकरणले जनाएको छ। ४५७ ग्यास सिलिन्डर अनुदानमा पठाइएको छ।

बाढीबाट प्रभावित क्षेत्रमा विद्युत् आपूर्तिसमेत क्रमशः सुधार हुँदै गएको छ। हालसम्म रसुवाका ७८ प्रतिशत, नुवाकोटका ९६.७ प्रतिशत र धादिङका ९९.८ प्रतिशत घरधुरीमा विद्युत् सेवा सुचारु भइसकेको प्राधिकरणको अद्यावधिक विवरणमा उल्लेख छ।