हिमाल प्रेस 
अर्थमन्त्री स्वर्णिम वाग्ले/फाइल तस्बिर
काठमाडौँ- अर्थमन्त्री डा. स्वर्णिम वाग्लेले बाढीप्रभावितको उद्धार र राहतका लागि तत्कालै आवश्यक पर्ने स्रोत र आवश्यकतामा कमी नहुने गरी काम गरिरहेको बताएका छन्।
भोटेकोशी बाढीबाट भएको क्षति, खोजी तथा उद्धार, राहत र पुनःस्थापनाका विषयमा राष्ट्रिय स्वतन्त्र पार्टीका सभापति रवि लामिछानेको आह्वान गरेको सर्वदलीय बैठकपछि सञ्चारकर्मीसँग प्रतिक्रिया दिँदै अर्थमन्त्री वाग्लेले बाढीप्रभावितको उद्धार, राहत कार्यमा कुनै पनि कमी हुन नदिने प्रतिबद्धता व्यक्त गरे।
‘अहिले यो दुई–चार दिन हामी राहत र उद्धारमा नै खटिरहेका छौँ। अलपत्र पर्नुभएका धेरै नेपाली नागरिक एवं विदेशी पर्यटकहरू सबैको उद्धार चलिरहेको छ,’ उनले भने, ‘मौसमले साथ दिएसम्म उद्धारका गतिविधिहरू चलिरहेकै छन्।’
अर्थमन्त्री वाग्लेले प्रधानमन्त्री दैवी प्रकोप उद्धार कोषमा दुई अर्ब ३४ करोड रुपैयाँ रहेको बताएका छन्।
‘अर्थ मन्त्रालयले गृह मन्त्रालयको लागि एक अर्ब १७ करोड विनियोजन गरिसकेको छ,’ उनले भने, ‘हामीसँग अहिले तत्काललाई साधन, स्रोत र आर्थिक आवश्यकतामा कमी नहुने गरेर अगाडि बढ्नको लागि मन्त्रिपरिषद्को बैठकले मलाई जिम्मेवारी दिएको छ।’
अर्थमन्त्री वाग्लेले उद्धार र राहतपछि मात्रै दीर्घकालीन, मध्यकालीनरूपमा पुनर्निर्माणका कामहरू अघि बढाइने बताए।
प्रभावित क्षेत्रमा पुनर्निर्माणको काम भने अत्यास लाग्दो रहेको बताउँदै उनले तथ्य र तथ्यांक आइसकेपछि २०७२ सालको भूकम्पमा जसरी नै पुनर्निर्माणको महाअभियान सञ्चालन गर्ने प्रतिबद्धता व्यक्त गरे।
अर्थमन्त्री वाग्लेले स्रोतसाधन र अन्तर्राष्ट्रिउ सहयोग जुटाउने काममा पनि सरकार लागिसकेको स्पष्ट पारे।
‘हामीले विश्व बैंकसँग कुरा गरेर करिब २५ अर्ब रुपैयाँ जतिको आर्थिक सहायता जुटाएका थियौँ,’ उनले भने, ‘चीन, भारत, जापान सरकारबाट, एसियाली विकास बैंकबाट, इन्टरनेसनल फेडरेसन अफ द रेडक्रस जेनेभाबाट तुरुन्तै सहयोगहरू आउने प्रतिबद्धता हामीले पाएपछि एउटा आत्मविश्वासका साथ हामी अगाडि बढेका छौँ।’
अर्थमन्त्री वाग्लेले बाढीको कारणले करिब २५ वटा पक्की पुल र ७०० मेगावाट क्षमताको जलविद्युत् आयोजनामा क्षति पुगेको बताए।
उनले सरकारले मात्रै नभएर सबै निकायसँग समन्वय गरेर अघि बढ्ने बताए। ‘समाजका सबै पक्ष, दल, निकायहरू पुनः निर्माणको अभियानमा लाग्नुपर्ने आवश्यकता छ,’ उनले भने।
