हिमाल प्रेस 
काठमाडौँ– नेपालका लागि पाकिस्तानी दूतावासले ‘कश्मीर एकता दिवस’को अवसरमा छलफल कार्यक्रमको आयोजना गरेको छ। कार्यक्रममा विश्लेषक, पत्रकार, लेखकका साथै मानव अधिकारकर्मीहरूको उपस्थिति थियो। छलफलमा पाकिस्तानका राष्ट्रपति, प्रधानमन्त्री र विदेशमन्त्रीको सन्देश पढेर सुनाइएको थियो। आफ्नो सन्देशमा राष्ट्रपति आरिफ अल्वीले आत्मनिर्णयको अधिकारको लडाइँमा ज्यान गुमाउने कश्मीरीहरूप्रति श्रद्धाञ्जलि अर्पण गरे।
उनले कश्मीरी जनताप्रति पाकिस्तानको पूर्ण समर्थन र ऐक्यबद्धता रहेको बताए। राष्ट्रपतिले कश्मीरीहरूलाई उनीहरूको आत्मनिर्णयको अधिकार प्राप्त नभएसम्मका लागि पाकिस्तानले सहयोग जारी राख्ने प्रतिबद्धता पनि जनाए। त्यसैगरी प्रधानमन्त्री मुहम्मद शहबाज शरीफले राष्ट्र संघको बडापत्र र संयुक्त राष्ट्र सुरक्षा परिषद्को प्रस्तावअनुसार कश्मीरको वैधानिकता र आत्मनिर्णयको अधिकारका लागि पाकिस्तान लागिपर्ने बताए।
उनले सैन्य घेराबन्दी र सञ्चार नाकाबन्दी तत्काल हटाउनका साथै भारतको गैरकानूनी र एकपक्षीय कार्य खारेज गर्न मागसमेत गरेका छन्। उनले मनमानी ढंगले पक्राउ परेका र गैरकानूनी रूपमा थुनामा रहेका सबैलाई रिहा गर्न आग्रह गरे।
