हिमाल प्रेस 
चितवन- चितवनमा यही साउनमा दुई जनामा डेंगु र ६ जनामा स्क्रब टाइफस संक्रमण पुष्टि भएको छ।
जनस्वास्थ्य कार्यालयका अनुसार हालसम्म जिल्लाका स्थानीय दुई जनामा डेंगु संक्रमणण पुष्टि भएको छ। कालिका नगरपालिकामा एक महिला र इच्छाकामना गाउँपालिकामा एक पुरुषमा डेंगु संक्रमणण देखिएको हो।
त्यसैगरी जिल्लाका स्थानीय ६ जनामा स्क्रब टाइफस संक्रमण पुष्टि भएको छ। भरतपुर महानगरपालिकाका एक पुरुष र चार महिलासहित पाँच तथा रत्ननगर नगरपालिकाका एक पुरुषमा स्क्रब टाइफस संक्रमण देखिएको कार्यालयले जनाएको छ।
अन्य जिल्लाबाट उपचारका लागि चितवन आएका दुई जनामा डेंगु र २८ जनामा स्क्रब टाइफस संक्रमण पुष्टि भएको छ।
यससँगै यो महिनाभर चितवनमा अभिलेख भएका डेंगु संक्रमितको सङ्ख्या चार र स्क्रब टाइफस संक्रमितको सङ्ख्या ३४ पुगेको छ।
जनस्वास्थ्य कार्यालयको तथ्याङ्कअनुसार हालसम्म डेंगुको १७८ र स्क्रब टाइफसको २११ जनाको परीक्षण गरिएको छ।
दुवै रोगका कारण हालसम्म कुनै पनि व्यक्तिको मृत्यु नभएको कार्यालयका भेक्टर कन्ट्रोल निरीक्षक राम केसीले जानकारी दिए।
