हिमाल प्रेस 
अमेरिकामा अहिले नर्वेका स्टार स्ट्राइकर अर्लिङ हालान्डको चर्चा मैदानभन्दा बाहिर पनि उत्तिकै छ। उनी अमेरिकामा निकै लोकप्रिय बन्दै गएका छन्। हालान्ड स्वयं पनि अमेरिकाप्रति सकारात्मक देखिन्छन्।उनी विश्वकै सर्वाधिक कमाइ गर्ने खेलाडीमध्ये एक हुन् र गत सिजन प्रिमियर लिगका शीर्ष गोलकर्ता पनि बनेका थिए। तर धेरै अमेरिकी समर्थकले उनलाई फुटबलभन्दा बढी सामाजिक सञ्जालका कारण चिनेका छन्।
हालान्डका रमाइला स्न्यापच्याट पोस्ट, कुनै आडम्बरबिनाका अन्तर्वार्ता र व्यक्तिगत भ्लगहरू निकै भाइरल भएका छन्। उनी श्रेक फिल्टर प्रयोग गरेर सेल्फी पोस्ट गर्छन् र ‘मेरो जुम्ल्याहा भाइसँगको सेल्फी’ भनेर लेख्छन्। प्रशंसकका टिप्पणीमा हाँस्ने इमोजीसहित प्रत्यक्ष प्रतिक्रिया दिन्छन्। एकपटक उनले ‘ओर्लान्डो’ लाई गल्तीवश ‘ओर्नाल्डो’ लेखेपछि सबै ‘पूर्ण’ दाजुभाइ-दिदीबहिनीसँग माफी माग्दै भिडियो बनाए। यसले झन् धेरैको मन जित्यो।
विश्वकपअघि धेरैले उनलाई गोल गर्ने मेसिन वा ‘पूरै गतिमा दौडिरहेको यो भाइकिङ तपाईंको अगाडि आयो भने?’ भन्ने मीममार्फत चिन्थे। तर अहिले उनी नयाँ पुस्ताका अमेरिकी समर्थकमाझ पनि अत्यन्त लोकप्रिय बनेका छन्।
न्यु जर्सीकी जुलियाना होफम्यानले भनिन्,‘मलाई पहिले उनी को हुन् भन्ने थाहा थिएन। नर्वेले ब्राजिललाई हराएपछि मात्र मैले उनलाई चिनेँ, अहिले मेरो सामाजिक सञ्जाल हालान्डका सामग्रीले भरिएको छ।’
उनका अनुसार विश्व फुटबलका सबैभन्दा ठूला स्टारमध्ये एक भएर पनि उनी निकै विनम्र छन्। विश्वकप अवधिमा हालान्डका इन्स्टाग्राम फलोअर ४ करोडबाट बढेर ६ करोड पुगेका छन्। अमेरिकाभरिका आफ्ना यात्राबारे बनाएका युट्युब भ्लगहरू लाखौँपटक हेरिएका छन्। एउटा भिडियोमा उनी टेक्सासको डलासस्थित एउटा पसलमा गएर काउब्वाय टोपी र बुट किन्छन् र टोपी झुकाउँदै भन्छन्, ‘यसरी सडकमा हिँड्न म निकै उत्साहित छु।’
त्यस भिडियोमा उनले ‘तिमीहरू सबैले मेरो डलास चुम्न सक्छौ।’ लेखिएको टी-सर्ट पनि लगाएका छन्। एक टेक्सासीले इन्स्टाग्राममा टिप्पणी गरेका छन्, ‘हामीले त उनलाई यहीँ राख्नुपर्छ।’
फ्लोरिडाको मियामीमा आयोजित नर्वेली उत्सवमा सहभागी मेरी नामकी एक अमेरिकीले भनिन्, ‘हामी सबै एर्लिङ हालान्डको समर्थन गरिरहेका छौँ। हामी उनलाई मन पराउन थालेका छौँ। उनी रमाइला पनि छन् र मैदानमा निकै शक्तिशाली पनि।’
मियामीका रोबर्टले भने, ‘म त श्रीमान् हालान्डबाट मोहित भएको छु। उनी त मेसिन जस्तै छन्, टर्मिनेटरलाई पनि पछि पार्छन्।’
रोबर्टले सामाजिक सञ्जालमा नर्वेली टोलीको भिडियोबाट प्रेरणा लिएर आफ्ना १० जना पिकलबल साथीहरूसँग नर्वेली शैलीको उत्सवसमेत आयोजना गरेका थिए। उनले भने,‘हामी अमेरिकीहरूलाई फुटबलबारे धेरै जानकारी नहुन सक्छ, तर हालान्ड साँच्चै अद्भुत छन्।’
हालान्ड स्वयं पनि अमेरिकाप्रति निकै सकारात्मक देखिन्छन्। आफ्नो एउटा भ्लगमा उनले भनेका छन्,‘यहाँका मानिसहरू धेरै मिलनसार र सकारात्मक छन्। उनीहरू जीवनको आनन्द लिइरहेका हुन्छन्।’
उनले थपे, ‘म निश्चित रूपमा फेरि अमेरिका आउनेछु।’
हालैको पत्रकार सम्मेलनमा अमेरिकी समर्थकबारे सोधिएको प्रश्नमा हालान्डले भने,‘मलाई अमेरिकीहरू मन पर्छन्। उनीहरू निकै रमाइला छन् र उनीहरूको शैली मलाई राम्रो लाग्छ।’
हालान्ड सामाजिक सञ्जालमा प्रशंसकसँग प्रत्यक्ष संवाद पनि गर्छन्। एक प्रयोगकर्ताले हरियो प्याजको तस्बिर पोस्ट गर्दै यो हरियो प्याज हालान्डजस्तै देखिन्छ कि म मात्र यस्तो सोचिरहेको छु? भनेर लेखेका थिए। त्यसमा हालान्डले एउटा रमाइलो जीआईएफमार्फत प्रतिक्रिया दिए जसमा करिब १५ लाख बढी लाइक पुगेका छन्।
