हिमाल प्रेस 
विश्वकपमा विपक्षी खेलाडीसँग मुख छोपेर बोलेको आरोपमा इक्वेडरका डिफेन्डर पिएरो हिन्कापिएले रातो कार्ड पाएका छन्। फिफाले यसै संस्करणदेखि लागू गरेको नयाँ नियमअन्तर्गत यस्तो कारणले रातो कार्ड पाउने उनी प्रतियोगिताका दोस्रो खेलाडी बनेका हुन्।
मेक्सिकोसँगको अन्तिम १६ को खेलको इन्जुरी समयमा हिन्कापिएले विपक्षी खेलाडीसँग कुरा गर्दा आफ्नो मुख छोपेका थिए। त्यसपछि रेफ्रीले उनलाई सिधै रातो कार्ड देखाएका थिए।
फिफाले खेलाडीहरूले मुख छोपेर अपशब्द प्रयोग गर्ने वा अनुचित व्यवहार गर्ने प्रवृत्तिलाई निरुत्साहित गर्न यस विश्वकपदेखि नयाँ नियम लागू गरेको हो।
यसअघि खेलाडीहरूले मुख छोपेर बोलेका कारण उनीहरूले के भने भन्ने पुष्टि गर्न कठिन हुने गरेको थियो। अब त्यस्तो व्यवहारलाई गम्भीर अनुशासनहीनता मान्दै रातो कार्ड दिने व्यवस्था गरिएको छ।
यसअघि समूह चरणमा पाराग्वेका मिगुएल अल्मिरोनले पनि टर्कीविरुद्धको खेलमा यही कारणले रातो कार्ड पाएका थिए।
मौसमका कारण निर्धारित समयभन्दा एक घण्टा ढिलो सुरु भएको खेलमा मेक्सिकोले इक्वेडरलाई २-० ले पराजित गर्दै विश्वकपको अन्तिम १६ मा स्थान सुरक्षित गरेको छ।
अज्टेका स्टेडियममा भएको खेलमा मेक्सिकोले सुरुदेखि नै दबाब कायम राख्यो। पहिलो हाफमै जुलियन क्विनोनेस र राउल जिमेनेजले गोल गरेपछि घरेलु टोलीले बलियो अग्रता बनाएको थियो। दोस्रो हाफमा पनि मेक्सिकोले खेललाई नियन्त्रणमा राख्दै इक्वेडरलाई फर्कने अवसर दिएन।
यस जितसँगै प्रशिक्षक जाभियर एगिरेको टोलीले अन्तिम १६ को खेल पनि मेक्सिको सिटीमै खेल्नेछ। अब मेक्सिकोले इंग्ल्यान्ड वा प्रजातान्त्रिक गणतन्त्र कंगोमध्ये एकसँग प्रतिस्पर्धा गर्नेछ।
