हिमाल प्रेस 
काठमाडौँ- फिफा विश्वकप २०२६ को नकआउट चरणमा जापानले अब पाँच पटकको विश्वकप विजेता ब्राजिलसँग भिड्ने भएको छ। जुन २९ मा अमेरिकाको ह्युस्टनमा हुने यो खेललाई प्रतियोगिताकै रोमाञ्चक प्रतिस्पर्धामध्ये एक मानिएको छ।
नाम र इतिहासका हिसाबले ब्राजिल बलियो टोली भए पनि यसपटकको प्रदर्शनले जापानलाई कमजोर आँक्न नमिल्ने संकेत दिएको छ।
फुटबल विश्लेषकहरूका अनुसार जापान अहिले अत्यन्त संगठित, अनुशासित र सन्तुलित टोलीका रूपमा उभिएको छ। ब्राजिलका प्रशिक्षक कार्लो एन्चेलोटी भने अझै पनि आफ्नो टोलीको उत्कृष्ट संयोजन खोज्ने प्रयासमै देखिएका छन्।
समूह चरणमा मोरक्कोसँग १-१ को बराबरी खेलेको ब्राजिलले अपेक्षाअनुसार लय समात्न सकेको छैन। त्यसको विपरीत जापानले ३-४-३ रणनीतिमा उत्कृष्ट प्रदर्शन गर्दै आक्रमण, मिडफिल्ड र रक्षापंक्तिमा प्रभावशाली समन्वय देखाएको छ। जापानी रक्षापंक्तिले विपक्षीलाई धेरै अवसर नदिँदा टोलीको आत्मविश्वास पनि उच्च बनेको छ।
जापानले प्रतियोगिताभर टेक्सासलाई आधार बनाएर खेलिरहेको छ। त्यसैले ह्युस्टनमा हुने खेलमा पनि उसले ठूलो संख्यामा समर्थकको साथ पाउने अपेक्षा गरिएको छ। ब्राजिलविरुद्धको चुनौती कठिन भए पनि जापानलाई अब कुनै पनि टोलीले सहज प्रतिद्वन्द्वीका रूपमा लिन सक्ने अवस्था छैन।
