हिमाल प्रेस 
काठमाडौँ- नेपाली सेनाले जटिल प्रसूति समस्यामा परेकी एक महिलाको हवाई उद्धार गरी उपचारका लागि अस्पताल पुर्याएको छ।
नेपाली सेनाको जनसम्पर्क तथा सूचना निर्देशनालयका अनुसार महिला, बालबालिका, लैंगिक तथा यौनिक अल्पसङ्ख्यक तथा सामाजिक सुरक्षा मन्त्रालयद्वारा राष्ट्रिय महिला सशक्तीकरण परियोजनाअन्तर्गत सञ्चालन गरिएको गर्भवती तथा सुत्केरी महिलाको नि:शुल्क हवाई उद्धार कार्यक्रमअन्तर्गत बाजुराको सर्केगाड गाउँपालिका-१ निवासी एक महिलाको उद्धार गरिएको हो।
बिहीबार (वैशाख ७ गते) जटिल प्रसूति समस्या देखिएपछि ती महिलालाई थप उपचार आवश्यक भएकाले नेपाली सेनाको हेलिकोप्टरमार्फत उद्धार गरी कर्णाली प्रदेश अस्पताल, सुर्खेतमा लगिएको निर्देशनालयले जनाएको छ।
दुर्गम क्षेत्रका गर्भवती तथा सुत्केरी महिलालाई समयमै स्वास्थ्य सेवा उपलब्ध गराउने उद्देश्यले सञ्चालन गरिएको हवाई उद्धार कार्यक्रमअन्तर्गत नेपाली सेनाले आवश्यकताअनुसार उद्धार कार्य गर्दै आएको छ।
