हिमाल प्रेस 
काठमाडौँ- गत तीन दिन बढेको नेपाल स्टक एक्सचेञ्ज (नेप्से) परिसूचक आज (बुधबार) चौथो कारोबार दिन भने दोहोरो अंकले घटेको छ। नेप्से परिसूचक २४ दशमलव ४५ अंकले घटेर दुई हजार ९३५ दशमलव ९४ को विन्दुमा कायम भएको हो।
आज (बुधबार) ३४५ कम्पनीको तीन करोड ५८ लाख १९ हजार ८२९ कित्ता सेयर एक लाख ३८ हजार २५६ पटक खरिदबिक्री हुँदा १५ अर्ब ९ करोड ४ लाख १६ हजार ८४६ बराबरको कारोबार भएको छ।
आजको कारोबारमा उत्पादन तथा प्रशोधन समूह शून्य दशमलव ४८ र व्यापार समूह तीन दशमलव ४५ प्रतिशतले बढेको छ भने अरू सबै समूहको उपसूचक घटेको छ। बैंकिङ एक दशमलव ४०, विकास बैंक दुई दशमलव ३२, वित्त दुई दशमलव ०९, होटल तथा पर्यटन शून्य दशमलव ०५, जलविद्युत् शून्य दशमलव १६,लगानी शून्य दशमलव ५३ र जीवन बिमा समूह एक दशमलव ३९ प्रतिशतले घटेको छ। त्यस्तै, लघुवित्त एक दशमलव ६४, म्युचुअल फन्ड शून्य दशमलव ३४, निर्जीवन बीमा एक दशमलव १५ र अन्य समूह एक दशमलव ७० प्रतिशतले घटेको छ।
रिलायन्स स्पिनिङ मिल्स लिमिटेड र सुपर खुदी हाइड्रोपावर लिमिटेडको सेयर मूल्यमा आज (बुधबार) सकारात्मक सर्किट लागेको छ। सबैभन्दा धेरै गुमाउनेमा भने अभियान लघुवित्त वित्तीय संस्था लिमिटेडको सेयर मूल्य सात दशमलव ७४ प्रतिशतले घटेको छ।
कारोबार रकमका आधारमा आज सबैभन्दा धेरै ङादी ग्रुप पावर लिमिटेडको ५२ करोड ४७ लाख ४७ हजार ५९३ बराबरको सेयर खरिदबिक्री भएको छ। त्यस्तै, कारोबार भएका सेयर सङ्ख्याका आधारमा आज सबैभन्दा धेरै कुमारी बैंक लिमिटेडको १६ लाख ७६ हजार ६२६ कित्ता सेयर किनबेच भएको छ।
