इरानका शीर्ष नेतृत्वले प्रयोग गर्ने विमान नष्ट गरेको इजरायलको दाबी

काठमाडौँ– इजरायली सेनाले तेहरानको मेहराबाद विमानस्थलमा इरानका शीर्ष नेतृत्वले प्रयोग गर्ने विमान नष्ट गरेको घोषणा गरेको छ।

इजरायलका अनुसार यस आक्रमणले तेहरान र यसको क्षेत्रीय सहयोगीहरूबीच समन्वयमा बाधा पुर्‍याउने अपेक्षा गरिएको छ।

सेनाले जारी गरेको विज्ञप्तिमा सो विमान वरिष्ठ राजनीतिक र सैन्य नेताहरूले घरेलु तथा अन्तर्राष्ट्रिय यात्राका लागि प्रयोग गर्दै आएका थिए। सेनाले विमान नष्ट हुँदा इरानी नेतृत्व र क्षेत्रीय सहयोगी समूहहरूबीच सञ्चारमा अवरोध आउने भनेको छ। तेहरानको सैन्य सुदृढीकरण ढिलो हुनेछ, र क्षतिग्रस्त क्षमताहरू पुनःस्थापना गर्ने क्षमता सीमित हुनेछ।

उक्त विमान एअरबस ४४० को रूपमा पहिचान गरिएको छ, जुन पूर्वराष्ट्रपति मासूद पेझेस्कियन र अघिल्ला समयमा सुप्रीम लिडर अली खमेनेईलगायत वरिष्ठ नेताहरूलाई विदेश यात्रा गर्न प्रयोग गरिएको थियो। इरानी अधिकारीहरूले आक्रमणको तत्काल पुष्टि गरेका छैनन्।

मेहराबाद विमानस्थल पश्चिमी तेहरानमा अवस्थित छ र राजधानीको पुरानो विमानस्थलमध्ये एक हो। तेहरानको इमाम खोमेनी अन्तर्राष्ट्रिय विमानस्थलले अधिकांश लामो दूरीका उडानहरू सञ्चालन गरेको भए पनि, मेहराबाद अझै देशको व्यस्त घरेलु विमानस्थल हो र यहाँ इरानी वायु सेना सहितका सैन्य सुविधा पनि रहेको छ।

सोमबार इजरायली सेनाले तेहरान, शिराज र टाबरिज सहरमा पनि लक्षित आक्रमण गरेको बताएको छ। यसरी, अमेरिकासँगको संयुक्त अभियान इरानविरुद्ध १७औँ दिनमा प्रवेश गरेको छ।