हिमाल प्रेस 
जनकपुरधाम- गृहमन्त्री ओमप्रकाश अर्यालले निर्वाचनलाई सफल बनाउन सुरक्षा निकायमा आबद्ध सबैको दायित्व भएको बताएका छन्।
संघीय गृह मन्त्रालय तथा मधेश प्रदेश गृह सञ्चार तथा कानुन मन्त्रालयद्वारा आज जनकपुरधाममा आयोजित प्रदेशस्तरीय सुरक्षा गोष्ठीमा उनले आगामी फागुन २१ गते निष्पक्ष रूपमा प्रतिनिधिसभा निर्वाचन हुने बताएका हुन्। उनले भने, ‘निष्पक्ष रूपमा निर्वाचन सम्पन्न गर्न सुरक्षा निकायका सबै अंगलाई गम्भीर भएर कार्यक्षेत्रमा लाग्नु होला।’
निर्वाचनलाई सफल बनाउन राजीतिक दल, नागरिक समाज तथा सञ्चारकर्मीलाई आग्रह गर्दै गृहमन्त्री अर्यालले समाजमा द्वन्द्व फैलाउने गतिविधि नगर्न सम्बद्ध पक्षलाई अनुरोध गरे।
प्रचलित कानुनविपरीत गर्नेलाई कारबाही हुने चेतावनी पनि उनले दिए। सामाजिक सञ्जालको दुरुपयोगतर्फ उनको भनाइ लक्षित थियो। जेनजीको चाहनाअनुसार वर्तमान सरकार गठन भएको बताउँदै उनले सुशासन कायम गर्नु तथा निर्धारित मितिमा निर्वाचन सम्पन्न गराउनु सरकारको कार्यादेश भएको गृहमन्त्रीले स्पष्ट गरे।
उनले उच्च मनोबलका साथ कार्यक्षेत्रमा परिचालन हुन र राष्ट्रले सुम्पेको अभिभारा पूरा गर्न सुरक्षा निकायका पदाधिकारीलाई निर्देशन पनि दिए। लुटिएका हतियार फिर्ता भइरहेको तथा शान्ति सुरक्षा कायम गर्नका लागि नेपाल प्रहरी र सशस्त्र प्रहरी लगायतका सुरक्षा निकायले सीमित साधन तथा स्रोतका बाबजुद निर्वाचनलाई सफल बनाउनेतर्फ लागिपरेको उनले बताए।
