हिमाल प्रेस 
काठमाडौँ- वीर अस्पतालमा ‘एनोरिज्म’ (नसा फुलेर फुट्ने रोगको) जटिल शल्यक्रिया गरिएको छ। अस्पतालका न्युरो सर्जरी विभाग प्रमुख डा.राजीव झाको नेतृत्वमा ६ वटा एनोरिज्म एकैपटक ९ घण्टा लगाएर सफलतापूर्वक शल्यक्रिया गरिएको हो।
उनले बिरामीको मस्तिष्कमा रहेका ६ वटा ‘एनोरिज्म’ को एकैपटकमा पहिलो शल्यक्रिया गरेर सफल उपचार गरेको बताए। यस्तो शल्यक्रिया अत्यन्त जटिल मानेर र कम मात्र देशमा यसको उपचार हुने उनको भनाइ छ।
‘एनोरिज्म’ मा नसा बेलुनजस्तै फुलेर फुट्ने गर्दछ। त्यसपछि मान्छेको ब्रेन ह्यामरेज भएर मृत्यु पनि हुनसक्दछ। शल्यक्रिया असोजको दोस्रो हप्ता गरिएको थियो। ‘ती बिरामीको एउटा ‘एनोरिज्म’ फुटेको थियो र अन्य पाँच वटा फुट्ने तयारीमा रहेका थिए’,उनले भने,‘तर हाम्रो टिमले ९ घण्टा लगाएर उक्त एनोरिज्मलाई शल्यक्रियामार्फत उपचार गर्न सफल भयौंँ।’ उनका अनुसार फुटेको एउटा ‘एनोरिज्म’ लाई बेलुनजस्तै बाँधेर राखिएको छ र अरु फुट्न तयारी रहेकालाई क्लिप लगाएर फुट्नबाट जोगाएर राखिएको छ।
उनले एकैव्यक्तिको मस्तिष्कमा ६ वटा एनोरिज्म कमैमात्रामा हुने गरेको बताए। बिरामीको एनोरिज्य एकदेखि चार वटासम्म सामान्य हुने र त्यसपछि पाँच तथा ६ वटा कमैमात्रामा हुने गर्दछ। उनले एनोरिज्म फुटेका ५० प्रतिशत बिरामी मात्र अस्पताल आउने र तीमध्ये ५० प्रतिशत मात्र उपचार पाएर बाँच्ने बताए। एनोरिज्मका कारणले बिरामीमा ब्रेन ह्यारेज हुने र तत्काल मृत्युसमेत हुने गर्दछ।
न्युरो सर्जरी विभाग प्रमुख डा.झाका अनुसार चुरोट र मादक पदार्थ सेवन गर्ने, उच्चरक्तचाप, मधुमेह भएकालाई एनोरिज्म हुने गर्दछ। उनले अहिलेसम्म ११ वटा यस्ता एनोरिज्मका बिरामीको सफल उपचार गरेका छन्।
‘अहिलेसम्म मैले चार वटा ‘एनोरिज्म’ बिरामीको सफलतापूर्वक उपचार गरेँ’, उनले भने, ‘तर अहिलेको बिरामीमा ६ वटा एनोरिज्म रहेको थियो, तैपनि हामीले ६ वटैको जटिल शल्यक्रिया सफलतापूर्व गर्यौँं।’ अस्पतालमा बर्सेनि सयभन्दा धेरै जना एनोरिज्म फुटेर आउने गर्दछन्। उनले अहिले बिरामीको अवस्था ठिक भइसकेको जनाए।
