गगन र विश्वप्रकाशले भने- हामी २०७२ को संविधानभन्दा पछि फर्कन दिँदैनौँ

काठमाडौँ- नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माले आफूहरूको सम्पूर्ण प्रयास देशलाई २०७२ को संविधानभन्दा पछि फर्कन नदिन केन्द्रित हुने स्पष्ट पारेका छन्।

जेनजी समूह, राष्ट्रपति र प्रधानसेनापतिबीच अबको सरकार गठन प्रक्रिया छलफल भइरहँदा कांग्रेसको यस्तो धारणा बाहिर आएको हो।

महामन्त्रीद्वयले बुधबार जारी गरेको विज्ञप्तिमा उल्लेख छ, ‘आमनागरिकको प्रतिनिधत्व, न्याय र समावेशिताका हकमा हामी जति अघि बढेका थियौँ, त्यसबाट पछि फर्किनु भनेको अरू यस्तै आन्दोलन र विद्रोहहरुको शृंखलालाई निम्तो दिनु हो भन्ने स्मरण गर्दै यसअघिका आन्दोलनका बेला अहिलेजस्तै गरी सार्वभौम नागरिकहरुले जिउज्यान दिएर हात परेका उपलब्धि नउल्टियून् भन्नेमा र देशलाई २०७२ को संविधानभन्दा पछि फर्कन नदिन अब हाम्रो सम्पूर्ण प्रयास केन्द्रित गर्नेछौँ।’

उनीहरूले परिवर्तनले सदैव अग्रगमनलाई बोक्नुपर्छ भन्ने मान्यतामा दृढ ढंगले प्रस्ट रहेको उल्लेख गरेका छन्।

महामन्त्रीद्वयले नयाँ सरकार गठन गर्ने पहललाई जेनजी पुस्ताको भावनाबमोजिम निष्कर्षमा पुर्‍याउन आग्रह गरेका छन्। त्यसो गर्दै गर्दा ‘आवश्यकताको सिद्धान्त’ बमोजिम हुने निर्णयलाई पनि संविधानबमोजिम वैधानिक बाटोबाट अगाडिको यात्रा तय गर्न सकिन्छ र गर्नुपर्छ भन्ने कुरा उनीहरूले स्मरण गराएका छन्।

उनीहरूले भनेका छन्, ‘वार्ताका क्रममा राष्ट्रपतिज्यू र जेनजी पक्षलाई हामी आग्रह गर्छौं- अब देश चलाउन र निर्वाचन गर्न नयाँ राजनीतिक संरचना बनाउँदा देशमा लामो संवैधानिक रिक्तता र शून्यता आउन नदिन हरसम्भव वैधानिक उपाय अपनाइयोस्, संविधान र लोकतान्त्रिक बाटोबाट नै समाधान खोज्दै यो बेथितिको अन्त्यको मार्गचित्र तय गरियोस्। त्यसमा हाम्रो समर्थन रहनेछ।’

यसैगरी उनीहरूले नेपाल देशको समुन्नति र सुन्दर भविष्यका लागि लोकतान्त्रिक प्रणालीको बाटोलाई नवीन ढंगले सुनिश्चित गर्ने गुरुत्तर दायित्वप्रति सबै गम्भीर बन्न आवश्यक रहेको स्मरण गराएका छन्। ‘मुलुकको सार्थक हित चाहने, शान्ति, सुशासन र समुन्नतिको मार्गमा हिँड्न चाहने सबैमा नेपाली कांग्रेस हार्दिक आह्वान गर्दछ’, विज्ञप्तिमा उल्लेख छ।

अहिलेको विषम परिस्थितिमा वार्ता र संवादमार्फत निकास दिनका लागि राष्ट्रपति रामचन्द्र पौडेलले लिएको लिएको पहलकदमीको स्वागत गर्दै उनीहरूले भनेका छन्, ‘सबै पक्षसँग आवश्यक परामर्श गरी संवादबाट समाधान खोज्न हामी आग्रह गर्दछौँ।’

उनीहरूले नेपाली सेना लगायत सबै सुरक्षा निकायहरूले शान्तिसुरक्षा कायम गर्न आआफ्नो स्थानबाट गरिरहेको प्रयास र संवाद प्रक्रियालाई आम नागरिक, नागरिक समाज, सञ्चार जगत्, अन्तर्राष्ट्रिय समुदाय सबै तहबाट पनि साथ–सहयोगका लागि अपिल गरेका छन्।

सोमबारको प्रदर्शनका दिन अत्यधिक बल प्रयोगबाट भएको गम्भीर अपराधको उच्चस्तरीय आयोगमार्फत गहिरो छानबिन गरेर दोषीहरुलाई कानुनी कारबाहीको दायरामा ल्याउनुपर्नेमा उनीहरूले ध्यानाकर्षण गराएका छन्।

महामन्त्रीद्वयले सामाजिक सञ्जाल खोल्न र पदत्याग गर्न आफूहरूले गरेको आग्रह र दबाब केपी शर्मा ओलीबाट ढिलाइ गर्दा स्थिति थप चर्किएको र अनियन्त्रित भएको तथ्य स्वीकार्न जरुरी रहेको उल्लेख गरेका छन्।

‘हाम्रो पटकपटकको आग्रहका बाबजुद परिस्थितिलाई नजरअन्दाज गर्नु, राजनीतिक नेतृत्वले स्थितिको सही आंकलन आफू गर्न सक्नुपर्छ या अरुले दिएको सही सुझावलाई समयमै ग्रहण गर्न सक्नुपर्छ, यो यथार्थ आत्मसात् गर्न प्रधानमन्त्रीले ढिलाइ गर्दा जो मानवीय क्षति भयो त्यसबाट सिंगो नेपाल र संसारभरका हामी सबै नेपाली स्तब्ध र अत्यन्तै दुखित छौँ’, विज्ञप्तिमा उल्लेख छ।

महामन्त्रीद्वय थापा र शर्माका अनुसार सोमबार भएको मानवीय क्षतिले दिएको चोटमाथि मंगलबारका घटनाले थप पीडा थप्न पुगेको हो। शान्तिपूर्ण प्रदर्शनमार्फत दबाब सिर्जना गराएर आफ्ना माग पूरा गराउने जेनजी पुस्ताको उद्घोष बिल्कुलै जायज रहेको उनीहरूको भनाइ छ। ‘तर सिंहदरबार, शीतल निवास, संसद् भवन, सर्वोच्च अदालतलगायतमा आगजनी गरेर देशको ऐतिहासिक धरोहर र खर्बौँको संरचना अनि लोकतान्त्रिक संस्था ध्वस्त गर्ने र सार्वजनिक सम्पत्तिमा नष्ट गर्ने घोषणा जेनजीको थिएन, र त्यो जेनजीको माग पनि होइन भन्ने हाम्रो विश्वास हो।’

उनीहरूले कैयौँ सरकारी कार्यालय, मिडिया हाउस, व्यवसायिक प्रतिष्ठान आदिमा गरिएको आगजनीको निन्दा गरेका छन्। उनीहरूले भनेका छन्, ‘आन्दोलनकारीको भावना र घोषणाभन्दा बाहिर आन्दोलनको हुलमुलमा नियतवश पसेकाहरूले योजनाबद्ध रुपमा यो सब विध्वंश गरेका हुन् भन्ने हाम्रो बुझाइ छ।’ जेनजी युवाहरुको स्वस्फुर्त प्रदर्शनमा विभिन्न स्वार्थ समूहले गरेको घुसपैठ, हिंसा, हत्या र योजनाबद्ध आगजनीको पनि उनीहरूले कठोर निन्दा गरेका छन्।

यसैगरी नागरिकको बोल्ने अधिकारको रक्षाका लागि लडेका नेता नेपाली कांग्रेसका सभापति शेरबहादुर देउवा र अन्य व्यक्तिमाथि अमानवीय ढंगले भएको भौतिक आक्रमणको पनि महामन्त्रीद्वयले निन्दा र भत्र्सना गरेका छन्।

संघीय लोकतान्त्रिक गणतन्त्र आइसकेपछि सत्तामा पुगेका व्यक्ति र पार्टीहरुले जनअपेक्षाको गतिमा काम गर्न नसकेको, बेथिति र भ्रष्टाचार मौलाएको विषयलाई गम्भीर आत्मसमीक्षा गरिरहेको उनीहरूको भनाइ छ।

‘सत्तालाई जवाफदेही बनाउन गरेका हाम्रा प्रयास पनि अपूर्ण रहेको, पर्याप्त हस्तक्षेप गर्न नसकेको र नयाँ पुस्ताको लय र चाहना समयमै बुझ्न नसकेकोमा हामी आत्मालोचित छौँ’, उनीहरूले भनेका छन्। अब फेरिएको यस परिस्थितिमा युवाहरुको आकांक्षा र अपेक्षाअनुसार जिम्मेवार राजनीति गर्ने दलका रुपमा नेपाली कांग्रेस पार्टीलाई जरैदेखि सम्पूर्ण रूपमा पुनर्निर्माण गर्ने प्रतिबद्धता पनि उनीहरूले व्यक्त गरेका छन्।

‘हामी विश्वस्त छौं– आवेग, उत्तेजना र प्रतिशोध यस्तो उथलपुथलका बेला आउने र जाने क्षणिक कुरा भएकाले अबको नेपाली कांग्रेस आमजनताको अपेक्षा, युवाहरुको भावना र अन्य भिन्न पुस्ताको अभिमत समेतलाई गाँसेर अझ सशक्त र जनउत्तरदायी दल बनेर अघि आउनेछ’, विज्ञप्तिमा उल्लेख छ।

उनीहरूले नवीन र चुनौतीपूर्ण परिस्थितिकै बीचबाट फेरि नयाँ ढंगबाट अगाडि बढ्ने र समुन्नतिको यात्रालाई सम्हाल्ने प्रतिबद्धता गरेका छन्। साथै अहिलेको विषम र अस्थिर परिस्थितिबाट उठ्न र पुनर्निर्माणमा जुट्न संयम, संवाद र एकता अपरिहार्य रहेको उनीहरूले जोड दिएका छन्। ‘अत्यन्तै कठिन अवस्था र प्रतिकूलताबीच पनि ‘सामाजिक एकता र सदभाव’ नेपाली समाजको विशिष्ट चरित्र हो। अहिलेको अवस्थामा यो चरित्र बलियो ढंगले प्रस्तुत गर्न स्वदेश र विदेशमा रहेका समस्त नेपाली आमाबुबा, दिदिबहिनी दाजुभाइमा हार्दिक आह्वान गर्दछौँ’, महामन्त्रीद्वयले भनेका छन्।