महासंघको आन्दोलनका कार्यक्रममा सहभागी हुन राहत शिक्षकलाई समितिको आग्रह

काठमाडौँ- नेपाल राहत शिक्षक केन्द्रीय समितिले नेपाल शिक्षक महासंघ राष्ट्रिय समितिको सर्कुलरअनुसार आज देशभरका ७५३ वटै स्थानीय तहमा ध्यानाकर्षण पत्र बुझाउँदै दुई घण्टा धर्ना दिने भएको छ।

समितिले देशभर कार्यरत सम्पूर्ण राहत शिक्षकहरूलाई आफ्ना–आफ्ना पालिकामा उक्त कार्यक्रममा सक्रिय सहभागिता जनाउन आह्वान गरेको छ।

साथै, नेपाल शिक्षक महासंघद्वारा घोषित सम्पूर्ण आन्दोलनका कार्यक्रमहरूमा सहभागी भई आवश्यक नेतृत्वदायी भूमिका निर्वाह गर्न समितिका केन्द्रीय, प्रदेश, जिल्ला तथा स्थानीय पदाधिकारी र सदस्यहरूलाई विशेष अपील गरिएको छ।

यस अभियानमा सम्पूर्ण राहत शिक्षकहरूको एकता र सहभागिताले आन्दोलनलाई थप सशक्त बनाउन मद्दत पुग्ने विश्वास व्यक्त गरिएको छ।

महासचिव डम्बर राई र अध्यक्ष नवीनसिंह धामीद्वारा जारी विज्ञप्तिमा आन्दोलन सफल पार्न सबैलाई आह्वान गरिएको छ।

विद्यालय शिक्षा विधेयकमार्फत आफूहरूलाई सरकारले पेसाबाट विस्थापित गर्न लागेको भन्दै राहत शिक्षकहरू आन्दोलित छन्।

यो पनि

शिक्षा विधेयकमा राहत, विद्यालय कर्मचारी, बालविकास, स्थायी शिक्षकबारे यस्तो छ व्यवस्था [प्रतिनिधिसभामा पेस गरिएको प्रतिवेदनको पूर्णपाठ]