हिमाल प्रेस 
काठमाडौँ– गृहमन्त्री रमेश लेखकले राष्ट्रको हित र आम नागरिकलाई थप सुविधा हुने गरी काम गर्न मातहतका कर्मचारीलाई निर्देशन दिएका छन्।
आइतबार गृहमन्त्रालयमा आर्थिक वर्ष २०८२/८३ का लागि मन्त्रालयका गृहसचिव एवं संगठन प्रमुख, महाशाखा र विभागीय प्रमुखहरुसित कार्यसम्पादन सम्झौता गर्दै गृहमन्त्री लेखकले लागुऔषध, सडक दुर्घटना, आत्महत्या र साइबरक्राइम नियन्त्रणमा पहिलो वर्ष काम भए पनि परिणाम आउन समय लाग्ने बताए।
‘लागूऔषध, सडक दुर्घटना, साइबरक्राइम, आत्महत्या गरी चारवटै विषय अहिलेका नयाँ चुनौति हुन। विशेष रुपमा काम भएको छ परिणाम आउन थोरै समय लाग्ला,’ उनले भने, ‘यो वर्ष परिणाम दिनेगरी काम गर्नुपर्छ।’
त्यसैगरी पश्चिम नेपाल भूकम्पको विस्तृत क्षति आँकलन भइरहेको भन्दै चालु आर्थिक वर्षभित्र पुर्ननिर्माण सक्ने गरी काम गर्न उनले निर्देशन समेत दिए।
उनले गत आर्थिक वर्षमा तोकिएको माइलस्टोनमा गृह मन्त्रालयले ८८ प्रतिशत प्रगति गरेकोप्रति बधाई एवं धन्यवाद दिए।
‘अहिलेको आवश्यकताअनुसार थप नयाँ कुरा के गर्न सकिन्छ, नीति, योजना तयार गरेर अघि बढ्नुस्,’ गृहमन्त्री लेखकले भने, ‘सीमित स्रोतसाधन, जनशक्ति र बजेटको सीमाभित्र बसेर काम गर्नुपर्छ।’
कार्य सम्पादन सामुहिक काम भएको बताउँदै उनले जस/अपजस सामुहिक रुपले लिनुपर्ने उल्लेख गरे।
त्यसैगरी मन्त्रालयको नेतृत्वमा आउँदै गर्दा नेपाल प्रहरी र सशस्त्र प्रहरीसम्बन्धी विधयेक अघि बढाएको बताउँदै प्रतिनिधिसभामा केही जटिलताका कारण रोकिएको बताए।
‘पाइपलाइनमा रहेका कानून विधयेक यो महिनाभित्र प्रतिनिधि सभामा दर्ता गर्ने गरी काम अगाढी बढाउनुस्,’ उनले भने, ‘मन्त्रालयको नीतिगत र कानूनी सुधार हाम्रो प्राथमिकताको विषय हो, सोही अनुसार काम अघि बढेको छ।’
