संसदमा रास्वपा र राप्रपाको विरोध कायमै

काठमाडौँ– भिजिट भिसा प्रकरणमा उच्चस्तरीय छानविन समिति गठन गर्नुपर्ने माग राख्दै रास्वपा र राप्रपाले प्रतिनिधिसभामा विरोध कायमै राखेका छन्।

सोमबार बैठक सुरु हुनेबितिकै दुई दलका सांसदहरुले उठेर विरोध जनाएका थिए। त्यसपछि सभामुख देवराज घिमिरेले रास्वपा सांसद असिम साहलाई बोल्न समय दिए।

सांसद साहले भिजिट भिसाको नाममा भइरहेको मानवतस्करीको फाइल कहाँ पुग्यो भन्दै गृहमन्त्रीलाई प्रश्न गरे। उनले घुस प्रकरणमा अडियो प्रकरणपछि राजीनामा दिएका राजकुमार गुप्तामाथि छानविन हुनुपर्ने बताए। उनले सरकारका मन्त्रीहरु विभिन्न प्रकरणमा जोडिएको भन्दै सिंहदरबारबाटै छानविन सुरु गर्न प्रधानमन्त्रीलाई सुझाव दिए।

त्यस्तै राप्रपा सांसद ध्रुबबहादुर प्रधानले भिजिट भिसाका विषयमा भएको कमीकमजोरीलाई उजागर गर्दा राप्रपा र रास्वपालाई व्यवस्था र संविधानविरोधी भनेर प्रधानमन्त्रीले भन्नु खेदजनक रहेको बताए।

उनले भिजिट भिसा प्रकरणमा न्यायीक छानविन नभएसम्म विरोध कायमै रहने स्पष्ट पारे। त्यसपछि दुबै दलका सांसदहरुले सदन बहिष्कार गरेका थिए।