एमालेले भन्यो- पूर्वराजाका गतिविधि दण्डनीय छ

काठमाडौँ- नेकपा एमालेले पूर्वराजा ज्ञानेन्द्र शाहको निर्देशन र उक्साहटमा संविधानविपरीतका गतिविधि भइरहेको आरोप लगाएको छ। प्रतिनिधिसभाको आकस्मिक समयमा बोल्दै एमाले प्रमुख सचेतक महेश बर्तौलाले पूर्वराजा ज्ञानेन्द्र शाहको प्रत्यक्ष सहभागिताका साथै निर्देशन र उक्साहटमा समाजमा संविधानविपरीतका गतिविधि भइरहेको आरोप लगाएका हुन्।

उनले मुलुकको राष्ट्रियगानलाई समेत अवमूल्यन गर्नेलगायतका राष्ट्रहित विपरीतका गतिविधि दण्डनीय भएकाले सरकारले गम्भीर ध्यान दिनुपर्ने र कानुनी दायरामा ल्याउनुपर्ने माग गरे।

बर्तौलाले लोकतन्त्रको विकल्प राजतन्त्र वा निरंकुशतन्त्र हुन नसक्ने भन्दै संग्रहालयमा थन्किएको राजतन्त्रले मुलुकमा शासन चलाउने सपना देख्ने वा देख्न लगाउने काम स्वीकार्य नभएको धारणा राखे।