हिमाल प्रेस 
काठमाडौँ- एकीकरण नेपाल गोरखा तथा रुम टु रिड कार्यक्रमको वार्षिक समीक्षा कार्यक्रम सम्पन्न भएको छ। यी संस्थाको आर्थिक व्यवस्थापन तथा सहयोगमा स्थानीय सरकारसँगको समन्वयमा सञ्चालन भएका कार्यक्रमको वार्षिक समीक्षा गरिएको हो। ‘साक्षरता तथा बालिका शिक्षा कार्यक्रम’को सन् २०२४ भित्र गरेका गतिविधिबारे समीक्षा कार्यक्रम सम्पन्न भएको एकीकरण नेपाल गोरखाले जनाएको छ।
कार्यक्रममा यो वर्षभर भएका कार्यक्रमको उपलब्धि, अभ्यास, सामना गरिएका चुनौती, समाधानका लागि गरिएका प्रयास र कार्यक्रमको दिगोपनका विषयमा छलफल गरिएको थियो।
कार्यक्रममा बालिका शिक्षा कार्यक्रमअन्तर्गत जिल्लाको पालुङटार, गोरखा नगरपालिका, सिरानचोक गाउँपालिका, भीमसेन थापा गाउँपालिकाका १९ वटाविद्यालयमा जीवन उपयोगी सीप कक्षाहरू तथा सामूहिक सहजीकरण निरन्तर चलिरहको र उक्त सहजीकरणबाट १०४५ जना बालिका लाभान्वित भएको एकीकरण नेपाल गोरखाले बताएको छ।
अभिभावक कार्यशाला, विश्व वातावरण दिवस, अन्तर्राष्ट्रिय बालिका दिवसमा विभिन्न प्रतियोगिता सम्पन्न भएको र करिब १२० जनाबालिका नेतृत्वदायी भूमिकामा समेत देखिएको कार्यक्रमका अधिकृत उमेश विश्वकर्माले जानकारी दिए।
साक्षरता कार्यक्रमअन्तर्गत गोरखाका शहिदलखन गाउँपालिका, अजिरकोट गाउँपालिका, बारपाक सुलिकोट गाउँपालिका, सिरानचोक गाउँपालिका, भीमसेन थापा गाउँपालिका, गण्डकी गाउँपालिकाको साथ-साथै गोरखा नगरपालिका, पालुङ्टार नगरपालिकाहरूमा रहेका १५० विद्यालयमा स्थापित पुस्तकालयबाट प्रतिविद्यार्थीले औषतमा एक बर्षमा ३३ ओटा पुस्तकहरू अध्ययन गरेको पाइएको छ।
यस वर्ष पुस्तकालय व्यवस्थापन सम्बन्धी ८६ जना, पुस्तकालय गतिविधि सम्बन्धी १२६ जना र नेपाली भाषा शिक्षण सम्बन्धी ३७९ जना शिक्षकहरूले विभिन्न चरणमा तालिम प्राप्त गरेको संस्थाले जनाएको छ। साथै थप २० वटा विद्यालयहरूमा कक्षा ३ मा पनि कार्यक्रमको परीक्षण सुरू गरिएको साक्षरता कार्यक्रम अधिकृत होमबहादुर थापाले जानकारी दिए।
एकीकरण नेपाल गोरखाका कार्यकारी निर्देशक हरि देवकोटाले यस २०२४ मा भएका कार्यले निकै उत्साह थपेको र आगामी वर्ष कायक्रमलाई अझ धेरै समुदाय केन्द्रित बनाउने, अन्य पालिकामा विस्तार गर्न आवश्यक रणनीति तय गरिने बताए।
कार्यक्रममा रूम टु रिड का वरिष्ठ फिल्ड कार्यक्रम व्यवस्थापक सुशील तिम्सिनाले २०२४ मा धेरै फलदायी काम भएको र आगामी वर्ष सन् अझ प्रभावकारी ढंगले काम गर्ने बताए।
