काठमाडौँ– नेपाली फिल्मको इतिहास करिब छ दशक लामो छ। ब्ल्याक एन्ड ह्वाइट फिल्म निर्माणबाट सुरु भएको नेपाली फिल्म उद्योगमा धेरै प्रविधि भित्रिइसकेका छन्। अहिले आइपुग्दा धेरै शैलीका फिल्म बन्न थालेका छन्। चकलेटी, एक्सन हिरो/हिरोइनको त कहिले सामाजिक र समुदायका कथाहरुले नेपाली फिल्म उद्योग चलायमान छ।
अहले सातापिच्छे नै नयाँ फिल्म प्रदर्शन भइरहन्छ। कहिले एउटा, दुईओटा त कहिले तीन फिल्मको प्रतिस्पर्धा हुन्छ। संख्यात्मक मात्रै होइन गुणात्मक रूपमा पनि नेपाली फिल्मले दर्शकको मन जित्ने क्रम बढ्दो छ। वर्षभरिमा ६० हाराहारीमा फिल्म प्रदर्शन हुन्छन्। मुस्किलै एक/आधा दर्जनजतिले चर्चा पाउँछन्। कतिपयले जेनतेन लगानी उठाउँछन्। कतिपयको लगानीचाहिँ बालुवामा पानी खन्याएझैँ हुन्छ।
वर्ष २०८१ लाई नियाल्ने हो भने सुरुवातदेखि नै नेपाली फिल्मले देश तथा विदेशमा चर्चा बटुलिरहेको छ। वैशाखदेखि मंसिरसम्ममा प्रदर्शन भएका अधिकांश फिल्म दर्शकले रुचाएका छन्। ‘बोक्सीको घर’ देखि ‘मनसरा’, ‘पुजार सार्की, ‘गाउँ आएको बाटो’, घरज्वाइँ, ‘शाम्बाला’, ‘खुश्मा’, ‘बेहुली फ्रम मेघौली’, ‘१२ गाउँ’, ‘छक्का पञ्जा ५’, ज्वाइँ साब’ र हलमा प्रदर्शनरत ‘पूर्ण बहादुरको सारङ्गी’, ‘ह्रस्व दीर्घ’ र ‘तेल भिसा’ को कथावस्तुले दर्शकलाई हलतर्फ डो¥याइरहेको छ। यी फिल्मले लगानीमात्र नउठाएर प्रशस्त आम्दानी पनि गरेका छन्।
गत कात्तिक १५ देखि प्रदर्शन भइरहेको ‘पूर्ण बहादुरको सारङ्गी’ले नेपाली फिल्म उद्योगकै रेकर्ड ब्रेक गर्यो। निर्माण टिमका अनुसार फिल्मले प्रदर्शनको १३ दिनमै साढे २३ करोड रुपैयाँ ग्रस कलेक्सन गरेर हालसम्मकै सर्वाधिक कमाउने पहिलो फिल्म बनेको छ। साथै यो फिल्मले एकै दिन ३ करोड रुपैयाँ कमाउने र साढे ४ सयभन्दा बढी सो पाउने फिल्ममा पनि रेकर्ड ब्रेक गरेको छ। फिल्मले हालसम्म ४५ करोडभन्दा माथि कमाइसकेको टिमको दाबी छ।
त्यसो भए कुन फिल्मले कसको रेकर्ड तोड्यो त?
अहिलेसम्म सर्वाधिक कमाउने फिल्मको सूचीमा क्रमशः ‘पूर्ण बहादुरको सारङ्गी’, ‘कबड्डी ४ः द फाइनल म्याच’, ‘छक्का पञ्जा ३’ ‘छक्का पञ्जा’ र ‘कोहिनुर’ छन्।
पूर्ण बहादुरको सारङ्गी
नेपालमा सर्वाधिक कमाउने फिल्मको पहिलो नम्बरमा परेको छ ‘पूर्ण बहादुरको सारङ्गी’। प्रदर्शनरत फिल्म ‘पूर्ण बहादुरको सारङ्गी’ ले २०७९ मा प्रदर्शन भएको फिल्म ‘कबड्डी ४’ को रेकर्ड तोडेको छ। चलचित्र विकास बोर्डका अनुसार ‘कबड्डी ४’ ले २१ करोड ३८ लाख ग्रस कलेक्सन गरेको थियो। निर्माण टिमले साढे २३ करोड कमाएको दाबी गरे पनि ‘पूर्ण बहादुरको सारङ्गी’ले दुवै रेकर्ड तोडेको छ।
प्रदर्शनको १३ औं दिनमा ‘पूर्ण बहादुरको सारङ्गी’ ले २५ करोड ४ लाख कमाएको निर्माण टिमले दाबी गरेको थियो। हालसम्मको तत्थ्यांकअनुसार ३० करोडमाथि कमाउने पहिलो फिल्म बनेको छ।
गन्धर्व समुदायको कथा र बाबुछोराको सम्बन्धलाई प्रस्तुत गरिएको फिल्ममा विजय बराल, अञ्जना बराइली, मुकुन भुसाल, प्रकाश सपूत मुख्य भूमिकामा छन्। फिल्मका निर्देशक सरोज पौडेल हुन्। सरोजकै कथा रहेको फिल्ममा महेश दवाडीको पटकथा र संवाद लेखन छ। फिल्म हलमा प्रदर्शन भइरहेको छ। फिल्मले हालसम्म ४५ करोडभन्दा माथिको ग्रस कलेक्सन गरेको टिमको दाबी छ। फिल्म १ करोड ३० लाखमा लगानीमा बनेको थियो।
कबड्डी ४
चर्चित फिल्म ‘कबड्डी’ को चौथो शृङ्खला सर्वाधिक कमाउने फिल्मको दोस्रो नम्बरमा परेको छ। चलचित्र विकास बोर्डको तत्थ्यांकअनुसार फिल्मले २१ करोड ३८ लाख ग्रस कलेक्सन गरेको थियो। २० करोड माथि कमाउने पहिलो नेपाली फिल्म हो ‘कबड्डी ४’।
फिल्मले २०७५ सालमा प्रदर्शन भएको ‘छक्का पञ्जा ३’ को रेकर्ड तोडेको थियो। ‘छक्का पञ्जा ३’ ले नेपालमा १८ करोड ग्रस कलेक्सन गरेको टिमको दाबी छ। रामबाबु गुरुङको निर्देशनमा बनेको फिल्म सामाजिक कथावस्तुमा आधारित छ। फिल्ममा सौगात मल्ल, दयाहाङ राई, मिरुना मगर, गौमाया गुरुङ, बुद्धि तामाङ, विजय बराल, प्रकाश घिमिरे, माओत्से गुरुङ, कविता आलेलगायत कलाकारको अभिनय छ। फिल्मको कथा निर्देशक गुरुङ र कवि तथा फिल्म निर्देशक उपेन्द्र सुब्बाले लेखेका हुन्। यो फिल्म युट्युबमा सार्वजनिक भइसकेको छ।
छक्का पञ्जा ३
दीपाश्री निरौलाको निर्देशनमा बनेको ‘छक्का पञ्जा ३’ ले आफ्नै फिल्म ‘छक्का पञ्जा’ को रेकर्ड तोडेको थियो। निर्माण टिमका अनुसार २०७५ सालमा प्रदर्शन भएको तेस्रो सिक्वेलले १८ करोड ग्रस कलेक्सन गरेको थियो। २०७३ सालमा पहिलो सिक्वेलले १६ करोड कमाएको थियो।
फिल्म सरकारी विद्यालयको शैक्षिक व्यथितिका विषयमा आधारित छ। फिल्ममा दीपकराज गिरी, केदार घिमिरे, जितु नेपाल, दीपिका प्रसाई, शिवहरि पौडेल, प्रियंका कार्कीलगायत कलाकारको अभिनय छ। फिल्मको कथा तथा पटकथा दीपकराज गिरीले लेखेका हुन्। फिल्मको संवाद लेखनमा गिरीसहित जितु नेपाल, केदार घिमिरे र यमन श्रेष्ठको सहकार्य थियो।
छक्का पञ्जा
२०७३ सालमा प्रदर्शन भएको ‘छक्का पञ्जा’ को पहिलो सिक्वेलले फिल्म ‘कोहीनुर’को रेकर्ड ब्रेक गरेको थियो। फिल्मले १६ करोड ग्रस कलेक्सन गरेको टिमको दाबी छ। यो फिल्म त्यसबेला सर्वाधिक कमाउने सूचीको पहिलो नम्बरमा थियो। त्यसअघि ‘कोहीनुर’ले ११ करोड कलेक्सन गरेको थियो।
फिल्म दीपाश्री निरौलाले निर्देशन गरेकी हुन्। उनको डेब्यु निर्देशनमा बनेको फिल्मको सफलतापछि यसको ५ औँ शृंखला पनि प्रदर्शन भइसकेको छ। फिल्ममा दीपकराज गिरी, प्रियंका कार्की, जितु नेपाल, केदार घिमिरे, बुद्धि तामाङ, शिवहरि पौडेललगायत कलाकारको अभिनय छ।
१० करोडमाथि कमाउने पहिलो फिल्म ‘कोहिनुर’
फिल्म ‘कोहिनुर’ नेपालमा १० करोड माथि कमाउने पहिलो फिल्म हो। २०७१ सालमा प्रदर्शन भएको फिल्मका लेखक तथा निर्देशक आकाश अधिकारी हुन्। उनका अनुसार फिल्मले ११ करोड कलेक्सन गरेको थियो। विदेशमासमेत गरी फिल्मले १४ करोड कमाएको थियो।
तत्कालीन समयमा सर्वाधिक कमाउने पहिलो फिल्म बनेको थियो। यसको रेकर्ड दुई वर्षपछि ‘छक्का पञ्जा’ले तोडेको थियो। फिल्ममा श्रीकृष्ण श्रेष्ठ, स्वेता खड्का, मिथिला शर्मा, सम्राट सापकोटालगायत कलाकारको अभिनय छ। फिल्म युट्युबमा सार्वजनिक भइसकेको छ।
