हिमाल प्रेस 
आईसीसी अध्यक्ष जय शाह
काठमाडौँ– भारतीय क्रिकेट बोर्ड (बीसीसीआई) का प्रमुख जय शाहले आइतबार अन्तर्राष्ट्रिय क्रिकेट परिषद् (आईसीसी) को अध्यक्षका रूपमा आफ्नो कार्यकाल सुरु गर्दै खेललाई ‘नयाँ उचाइमा’ लैजान चाहेको बताएका छन्।
भारतका गृहमन्त्री अमित शाहका छोरा अगस्तमा आईसीसी अध्यक्षमा निर्विरोध निर्वाचित भएका थिए। र, ग्रेग बार्कलेको उत्तराधिकारी बनेका थिए। बार्कलेले तेस्रो कार्यकाललाई निरन्तरता नदिने निर्णय गरेका थिए।
छत्तिस वर्षको उमेरमा आईसीसी अध्यक्षको पद सम्हाल्ने शाह सबैभन्दा कान्छो व्यक्ति हुन्।
‘क्रिकेटमा विश्वव्यापी रूपमा अपार सम्भावनाहरू छन् र म यी अवसरहरूको सदुपयोग गर्दै क्रिकेटलाई नयाँ उचाइमा लैजान आईसीसी टोली र सदस्य देशहरूसँग नजिकबाट काम गर्न इच्छुक छु,’ शाहले भनेका छन्।
सन् २०२८ को ओलम्पिकका लागि तयारी भइरहेको र ‘क्रिकेटलाई विश्वव्यापी प्रशंसकहरूका लागि थप समावेशी र आकर्षक बनाउन’ काम गरिरहेको खेलका लागि यो ‘रोमाञ्चक’ समय भएको उनले बएका छन्।
विश्वको सबैभन्दा धनी क्रिकेट बोर्डको प्रमुखदेखि आइसिसीको नेतृत्व गर्न शाहको जबर्दस्त उदयले क्रिकेटको विश्वव्यापी प्रशासनमा भारतको प्रभुत्वलाई चित्रण गर्दछ।
खेलकुद र राजनीतिसँगै चल्ने देशमा शाह प्रधानमन्त्री नरेन्द्र मोदीका दाहिने हात अमित शाहका छोरा हुन्।
आईसीसी क्रिकेटका लागि विश्वव्यापी प्रशासकीय निकाय हो। यसमा १०० भन्दा बढी सदस्य छन् र यसले विश्वकप जस्ता विश्वव्यापी प्रतियोगिताहरू आयोजना गर्दै आइरहेको छ।
भारतले आयोजक राष्ट्र पाकिस्तानको भ्रमण गर्न अस्वीकार गरेपछि अर्को वर्षको च्याम्पियन्स ट्रफीको भाग्य अधरमै परेपछि शाह आईसीसीको नेतृत्व सम्हालेका हुन्। च्याम्पियन्स ट्रफीबारे जारी विवाद सुल्झाउन वार्ता अझै जारी रहेको बताइएको छ। यसअघि एसिया कप क्रिकेट भएझैँ विश्व च्याम्पियनसीप क्रिकेट पनि ‘हाइब्रिड’ मोडेलमा गर्न पनि प्रस्ताव आएको छ।
