हिमाल प्रेस 
काठमाडौँ- गायिका समीक्षा अधिकारीको स्वरमा ‘मुटु रेटियो’ बोलको गीत सार्वजनिक भएको छ। प्रेम सम्बन्धको मार्मिक कथामा बनेको गीत प्रितम श्रेष्ठले लेखेका हुन्। प्रितमले नै संगीत भरेकाे गीतमा कृष्ण बाजुरालीको संगीत संयोजन छ।
गीतको भिडियोमा मोडल स्मारिका ढकाल, मुकुन्द भट्ट र कलाकार रिता शिवाकोटीको मुख्य अभिनय छ। काठमाडौँ उपत्यकाका रमणीय र पर्यटकीय स्थलमा गीतको छायांकन गरिएको छ।
प्रवीण थापाले निर्देशन गरेको भिडियो महेश महेराको छायांकन, अमृत चापागाईंको सम्पादन र रङ संयोजनमा बनेको छ। गीतको सहायक निर्देशक अमृत भट्टराई हुन्।
गीतमार्फत नारीले प्रेममा धोका पाएपछि नेपाली समाजले गर्ने गलत व्यवहार चित्रण गर्न खोजिएको गीतकार तथा संगीतकार श्रेष्ठले बताए। ‘नेपाली समाजमा महिलालाई गरिने व्यावहार अझै फरक छ। गीतले फरक व्यवहार भयो भन्दैमा समस्याबाट भाग्नु हुँदैन, डटेर सामना गर्नुपर्छ भन्ने सन्देश दिन खोजेको छ’, उनले भने। अमेरिकाबासी श्रेष्ठका यसअघि सार्वजनिक ‘माथि माथि माया बग्छ’ र ‘मायालु’ बोलका गीतलाई पनि दर्शकले मन पराएका छन्।
गीत प्रितम श्रेष्ठको आधिकारिक युट्युब च्यानलबाट सार्वजनिक गरिएको हो।
यस्ताे छ गीत
