हिमाल प्रेस 
काठमाडौँ- सिन्धुलीबाट काठमाडौँतर्फ ल्याइँदै गरेका दुईजना बिरामीको एम्बुलेन्समै ज्यान गएको छ। पहिरोले सडक अवरुद्ध हुँदा सिन्धुली र महोत्तरी बर्दीबासबाट दुई एम्बुलेन्समा ल्याइएका दुई बिरामीको ज्यान गएको हो।
जिल्ला प्रहरी कार्यालय सिन्धुलीका डीएसपी अनिलकुमार खड्काका अनुसार सिन्धुली अस्पतालबाट बा २१ च ७५२३ र महोत्तरीको बर्दिवासबाट ज १ च १७०८ नम्बरको एम्बुलेन्स बिरामी बोकेर काठमाडौँ आउँदै गर्दा वीपी राजमार्गमै अड्किएपछि दुईजना बिरामीको मृत्यु भएको हो।
कमलामाई नगरपालिका-४ मल्लागाउँकी ९८ वर्षकी वृद्धा टीकाकुमारी भुजेल र महोत्तरी बर्दिवास नगरपालिका-८ का ४५ वर्षका मानबहादुर सिंजालीले एम्बुलेन्समै ज्यान गुमाएका हुन्। भुजेलमा दमसम्बन्धी रोग थियो भने सिंजालीमा किड्नीको समस्या रहेको थियो।
बाढी पहिरोका कारण सुनकोसी गाउँपालिका-१ दुम्दाअन्तर्गत बीपी राजमार्ग चारदिनदेखि अवरुद्ध छ। बाढी पहिरोकै कारण अहिले शवसमेत फर्काउन सकिएको छैन।
