खानेपानीमन्त्री यादव र भुटानका ऊर्जा तथा प्राकृतिक स्रोतमन्त्री छिरिङबीच भेटवार्ता

काठमाडौँ– नेपालका खानेपानीमन्त्री प्रदीप यादव र भुटानका ऊर्जा तथा प्राकृतिक स्रोतमन्त्री ल्योन्पो जेम छिरिङबीच भेटवार्ता भएको छ।

‘इन्टरनेशनल सेन्टर फर इन्टिग्रेटेड माउन्टेन डेभलपमेन्ट’ द्वारा आयोजित दोस्रो हिन्दूकुश हिमालय मन्त्रिस्तरीय शिखर सम्मेलनमा सहभागी हुन नेपाल भ्रमणमा रहेका मन्त्री छिरिङ र यादवबीच बिहीबार सिंहदरबारस्थित मन्त्रालयमा भेट भएको हो।

भेटमा मन्त्री यादवले नेपाल र भुटानबीच प्राचीन सामाजिक–सांस्कृतिक सम्बन्ध रहेको बताउँदै भूपरिवेष्टित हिमाली भूगोल, विकास चुनौती र जलवायु परिवर्तनका साझा मुद्दामा सहकार्यको सम्भावना औँल्याए। उनले भने, ‘दुवै देशले पानी प्रशोधन र ढल व्यवस्थापनका क्षेत्रमा प्रभावकारी अनुभव र प्रविधि आदानप्रदान गर्न सक्छन्।’

मन्त्री यादवले पानीको गुणस्तर अनुगमन र नदी तथा खोलामा प्रदूषणको मूल्याङ्कन गर्ने संयुक्त कार्यक्रम सञ्चालन गर्न नेपाल र भुटानबीच सहकार्य हुनुपर्ने बताए। उनले विशेषगरी ग्रामीण क्षेत्रमा सौर्य ऊर्जाबाट चल्ने पानी प्रशोधन प्रणाली र गुरुत्वआधारित प्रविधिजस्ता कम लागतका समाधान प्रवर्द्धन गर्न सहकार्यको प्रस्ताव राखे।

भुटानले वातावरणमैत्री ढल व्यवस्थापनमा गरेको प्रगतिको प्रशंसा गर्दै मन्त्री यादवले यस क्षेत्रका दिगो प्रविधि नेपालमा पनि भित्र्याउन सकिने जिकिर गरे। उनले ढलबाट बायोग्यास उत्पादनजस्ता विधिबाट दुवै देशले नवीकरणीय ऊर्जामा योगदान गर्न सक्ने सम्भावना औँल्याए।

भुटानी मन्त्री छिरिङले नेपाल र भुटानबीचको व्यापार सिधा हुनुपर्ने जोड दिँदै भारतको बाटो हुँदै व्यापार गर्दा भुटानी उत्पादन महँगो हुने गरेको उल्लेख गरे। उनले नेपालमा भुटानको चामल र आलु लोकप्रिय भएको तर महँगो पर्ने समस्या समाधानका लागि सिधा व्यापारको आवश्यकता औँल्याए।

मन्त्री छिरिङले धार्मिक पर्यटनमा भुटानी नागरिकलाई नेपाल भ्रमणका लागि सहजता प्रदान गर्नुपर्ने धारणा राखे। नेपालको जलविद्युत् विकास, पर्यापर्यटन र स्वच्छ पानी व्यवस्थापनको क्षेत्रमा भुटानसँग सहकार्य गर्ने प्रस्ताव राख्दै उनले भुटानी अनुभवबाट नेपालले महत्त्वपूर्ण पाठ सिक्नसक्ने बताए।

भेटका क्रममा भुटानी मन्त्री छिरिङले नेपाल र भुटानको पर्यटन र जलस्रोत क्षेत्रको प्रवर्द्धनका लागि सहकार्य गर्नुपर्नेमा जोड दिए। भुटानको अतिकम विकसित राष्ट्रबाट स्तरोन्नतिको सफल यात्राका लागि मन्त्री यादवले भुटानी समकक्षीलाई बधाई ज्ञापन गर्दै, भुटानको अनुभवले नेपाललाई प्रेरणा दिने विश्वास व्यक्त गरे।