हिमाल प्रेस 
ललितपुर- ललितपुर महानगरपालिका-२१ खोकनामा रहेको रुद्रायणीदेवी मन्दिर पुनर्निर्माणको काम अझै सकिएको छैन। २०७२ को गोर्खा भूकम्पले क्षति पुर्याएको मन्दिर पुनः निर्माणको काम सुरु भएको चार वर्ष भइसक्दा पनि बजेट अभावले काम अझै नसकिएको जनाइएको छ।
ललितपुर महानगरपालिकाको सहयोगमा २०७८ देखि रुद्रायाणीदेवी पुनःनिर्माण उपभोक्ता समितिले काम सुरु गरेको थियो। समितिका अध्यक्ष अध्यक्ष बेखनर महर्जनले महानगरबाट एकमुस्ट बजेट नआउँदा काम समयमै सम्पन्न नभएको बताए। उनले महानगरपालिकाले हरेक वर्ष बजेट छुट्याउने गरेका सोअनुसार काम भएको जानकारी दिए।
भूकम्पले क्षति गरेका ललितपुरका अन्य मन्दिर पुनःनिर्माण भए पनि यस मन्दिरको पुनःनिर्माण ढिलाइ भएको रुद्रायणीदेवी गुठीका अध्यक्ष उदयकुमार डुंगोको भनाइ छ। बजेट अभावले मन्दिर पुनःनिर्माण ढिला भएको भए पनि महानगरको वार्षिक बजेटअनुसार काम भने भएको उनले बताए। हालसम्म चार करोड भन्दाबढी खर्च भइसकेको उनको भनाइ छ। अहिलेकै अवस्थामा मन्दिर पुनः निर्माणको काम सम्पन्न हुन अझै दुई वर्ष लाग्ने देखिएको उनले जानकारी दिए।
सोही गुठीका सदस्य हेराबहादुर डंगोलले समयमै मन्दिर निर्माण नहुँदा यहाँ रहेका मूर्तिलाई अस्थायी मन्दिरमा राखेको र छिटो काम सकेर रुद्रायायणीदेवी जात्रा र पूजाआजाको लागि सहज अवस्था बनाउन आग्रह गरे।
रुद्रायणी मन्दिरको पुनःनिर्माणको लागि २०७८ भदौ २३ गते पूर्व ऊर्जा, जलस्रोत तथा सिँचाइमन्त्री पम्फा भुसालले शिलान्यास गरेकी थिइन्। करिब आठ करोडमा पुनःनिर्माणको जिम्मा लिएको उपभोक्ता समितिले काममा ढिलाइ हुँदा लागत बढेर १० करोड भन्दाबढी खर्च हुन सक्ने जनाएको छ।
