हिमाल प्रेस 
काठमाडौँ- रियल मड्रिडले ला लिगामा प्रतिद्वन्द्वी बार्सिलोनालाई पराजित गरेको छ।
आइतबार राति भएको खेलमा रियल ३-२ गोलले विजयी बन्यो। बार्सिलोनाका आन्द्रेस क्रिस्टिएनसनले खेलको छैटौँ मिनेटमा नै पाहुना टोलीलाई अग्रता दिलाए। तर, भिनिसियस जुनियरले पेनाल्टीबाट गोल फर्काएपछि पहिलो हाफमा १-१ को बराबरीमा सकिएको थियो।
दोस्रो हाफमा पनि फर्मिन लोपेजले पुनः बार्सिलोनालाई अग्रता दिलाए। यसपटक ४ मिनेटपछि नै लुकास भाज्क्वेजले रियलका लागि बराबरी गोल गरे।
खेल बराबरीतर्फ अघि बढिरहँदा ९१ औँ मिनेटमा बेलिङह्यामले निर्णायक गोल गर्दै टोलीका लागि ३ अंक सुनिश्चित गरे। जितपछि रियलले ला लिगाको शीर्ष स्थानमा ११ अंकको अग्रता बनाउन सफल भएको छ।
अब लिगमा ६ खेल मात्र बाँकी छँदा टोलीको ३२ खेलबाट ८१ अंक छ । दोस्रो स्थानमा रहेको बार्साको समान खेलबाट ७० अंक छ।
आइतबार नै भएका अन्य खेलमा एट्लेटिको मड्रिड आलाभेससँग २-० ले स्तब्ध बन्यो। त्यस्तै भिल्लारियालले अल्भेरियालाई २-१ ले हराउँदा गेटाफे र रियल सोसिडाड बराबरीमा रोकिए।
