हिमाल प्रेस 
काठमाडौँ – परराष्ट्र मामिला अध्ययन प्रतिष्ठान (आईएफए) ले ‘शरणार्थी, फिर्ती र साझा समृद्धि’ विषयक उच्चस्तरीय नीति संवाद आयोजना गरेको छ। कार्यक्रम बुधबार काठमाडौँमा सम्पन्न भएको हो।
प्रतिष्ठानका कार्यकारी निर्देशक डा.राजन भट्टराईले भारत–नेपाल द्विपक्षीय तथा नेपाल–भारत भुटान त्रिपक्षीय सहयोगमा भुटानी शरणार्थी समस्या बढ्दो महत्वको विषय बन्दै गएको बताए।
उनले शरणार्थी समस्या समाधान नहुँदा जनस्तरको सम्बन्ध र सहकार्यमा असर परिरहेको बताए।
कार्यक्रममा प्रमुख वक्ताका रुपमा बोल्दै बिमस्टेकका महासचिव डा.इन्द्रमणि पाण्डेले यो मुद्दामा आफूले निरन्तर सहयोग र ठोस कदम चाल्ने प्रतिबद्धता जनाए।
उनले बिमस्टेक राष्ट्रहरुबीच जनस्तरको सम्बन्ध, सहकार्य, व्यापार र वाणिज्यलाई प्रवद्र्धन गर्नुपर्नेमा जोड दिए।
परराष्ट्र मन्त्रालयका सहसचिव कृष्ण शाहीले बिमस्टेकको विकास, उपलब्धि र चुनौतीहरुबारे चर्चा गरे।
उनले क्षेत्रीय एकीकरण, जनस्तरको सम्बन्ध विस्तार र सदस्य राष्ट्रबीचको आपसी समझदारी अभिवृद्धिमा जोड दिए।
प्रतिष्ठानका कार्यकारी अध्यक्ष तथा वरिष्ठ अधिकारीहरुको उपस्थिति रहेको कार्यक्रममा भुटानी शरणार्थी समस्या १९९० को दशकमा सुरु भएको र एक लाखभन्दा बढी ल्होत्साम्पा समुदायका व्यक्तिहरु भुटानबाट विस्थापित भएको ऐतिहासिक पृष्ठभूमिमाथि पनि चर्चा भएको थियो।
नेपाल र भुटानबीचका द्विपक्षीय वार्ता तथा भारतको समेत संलग्नतामा भएका त्रिपक्षीय छलफलहरुका बाबजुद फिर्ती प्रक्रिया चुनौतीपूर्ण रहेको उल्लेख गरियो।
कार्यक्रमका सहभागीहरुले क्षेत्रीय सहकार्यलाई थप मजबुत बनाउने, समावेशी र जनकेन्द्रित दृष्टिकोण अपनाउने साझा प्रतिबद्धता व्यक्त गरेका छन्।
