हिमाल प्रेस 
बिमस्टेक शिखर सम्मेलनमा सामूहिक तस्बिर खिचाउँदै बायाँबाट प्रधानमन्त्री केपी शर्मा ओली, भारतीय प्रधानमन्त्री नरेन्द्र मोदी, बंगलादेशका सरकार प्रमुख महोम्मद युनिस, थाइल्यान्डकी प्रधानमन्त्री पेथोङ्थान सिनावात्रा, भुटानी प्रधानमन्त्री छिरिङ तोग्बे, म्यानमारको सरकार प्रमुख मिन ओङ र श्रीलंकाकी प्रधानमन्त्री हरिनी अमरसुरिया। तस्बिर : रासस
बैंकक- बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को छैटौँ शिखर सम्मेलन बैंकक सोचपत्रपत्र २०३० जारी गर्दै सम्पन्न भएको छ।
यस क्षेत्रको व्यापार विस्तार, सम्पर्क सञ्जाल र मानवीय सुरक्षालाई केन्द्रमा राखेर सम्मेलनले समृद्धि, लचिलोपन र खुलापनको नाराअन्तर्गत बिमस्टेक बैंकक भिजनसहित छबुँदे प्रस्ताव पारित गरेको हो। पारित प्रस्तावबारे जानकारी दिन आयोजक राष्ट्र थाइल्यान्डकी प्रधानमन्त्री पेथोङ्थान सिनावात्राले यहाँ पत्रकार सम्मेलन गरेकी छन्।
प्रस्तावमा बिमस्टेकलाई प्रभावकारी बनाउन कार्यमुखी संयन्त्र गठन, यसको भविष्य निर्धारणका लागि प्रबुद्ध व्यक्तिहरूको समूह (ईपीजी) गठन, म्यारिटाइम ट्रान्सपोर्ट सम्झौता, भूकम्पबाट प्रभावित म्यान्मार र थाइल्यान्डलाई सहयोग गर्ने विषयसहितको संयुक्त वक्तव्य, पर्यटन र संस्कृतिलाई प्राथमिकता दिँदै जनता-जनताको सम्पर्क विस्तारका विषय छन्।
थाई प्रधानमन्त्री शिनावात्राले शिखर सम्मेलनको सम्मुखमा नेपालका प्रधानमन्त्री केपी शर्मा ओलीको पहिलो औपचारिक थाइल्यान्डको भ्रमण गरेर दुई देशबीचको सम्बन्धमा नयाँ आयाम थपिएको बताइन्। शिखर सम्मेलनमा प्रधानमन्त्री ओलीसहित सदस्य मुलुकका सरकार प्रमुखले सम्बोधन गरेका थिए।
