हिमाल प्रेस 
काठमाडौँ- राष्ट्रियसभा सदस्य रुक्मिणी कोइरालाले मन्त्रालयहरूबीच समन्वय नहुँदा विकास कार्यमा अवरोध भएको बताएकी छन्। राष्ट्रिय समाचार समितिसँगको कुराकानीमा कोइरालाले मन्त्रालयहरूबीच गहन समन्वय नहुँदा विकासका कैयौंँ कार्यमा अवरोध भएको बताइन्।
उनले भनिन्, ‘एउटा मन्त्रालयले बाटो बनाएको छ,अर्को मन्त्रालयले ढलको लागि भन्दै त्यही बाटो फेरि भत्काएको देखिन्छ। अर्को मन्त्रालयले बिजुलीको लागि भन्दै बाटो भत्काएको छ। यो प्रवृत्ति रोक्न कानुनी पक्षका साथै अन्तर–निका समन्वय जरुरी हुन्छ।’
देशमा केही भएको छैन भनेर निरन्तर अफवाह फैल्याउन उचित नहुने भन्दै कोइरालाले केही न केही काम भइरहेको र भएको छ भन्ने सोचका साथ अगाडि बढ्नुपर्ने बताइन्।
‘अरु बेला झगडा गरेपनि देश विकासका निम्ति सबै राजनीतिक दल एकै ठाउँमा उभिनुपर्छ। सबै दलहरू मिलेर देशको व्यवस्था परिवर्तन भएको हो,’ उनले भनिन्, ‘अब जनताको अवस्था परिवर्तन गर्नका लागि पनि संसद्मा भएका सबै राजनीतिक दलहरू एकै ठाउँमा उभिनुपर्छ। एकले अर्कालाई गाली गरेर, आरोप लगाएर होइन कि आपसमा सहकार्य गरेर जानुपर्छ।’
