हिमाल प्रेस 
काठमाडौँ- पूर्वमन्त्री एवं प्रतिनिधिसभा सदस्य वसन्तकुमार नेम्वाङको स्वास्थ्य अवस्थामा सुधार आएको छ।
गत माघ १७ गते एमाले ताप्लेजुङको सचिवालय बैठकमा सहभागी हुन पुगेका नेम्वाङलाई ‘ब्रेन स्ट्रोक’ भएको थियो।
उनलाई त्यही दिनै हेलिकाप्टरमार्फत् काठमाडौं ल्याइएको थियो।
अहिले उनको मेडिसिटी हस्पिटलमा उपचार जारी रहेको अवस्थामा सुधार आइरहेको उनकी पत्नी भूमिका सुब्बाले सामाजिक सञ्जालमार्फत् जानकारी दिएकी छन्।
‘उहाँको स्वास्थ स्थितिबारे बुझ्न मलाई धेरै कलहरू र म्यासेजहरू आइरहेको छ तर मैले रेस्पोन्स गर्न सकिरहेको छैन। हाल उहाँको स्वास्थ्यमा क्रमिक सुधार भइरहेको यसैमार्फत् जानकारी गराउन चाहन्छु,’ उनले भनेकी छन्।
चिकित्सकको सल्लाहअनुसार बाहिरी संक्रमणबाट जोगाउन परिवारको केही सदस्यबाहेकलाई भेटघाट नगराइएको उनले जानकारी दिएकी छन्। ब्रेन स्ट्रोक भएका नेम्वाङले सामान्य कुराकानी समेत गर्न थालेका छन्।
चिकित्सकले समेत अवस्था खतरामुक्त भनेको पारिवारिक स्रोतले जनाएको छ।
