दुर्घटनाबाट जोगियो यात्री बस

बैतडी– धनगढीबाट बझाङ जाँदै गरेको कर्णाली रिभर यातायातको ना६ख१९८३ नम्बरको बस शुक्रबार बिहान ठूलो दुर्घटनाबाट जोगिएको छ। बस बझाङको जयपृथ्वी नगरपालिका–७ सुबेडा खड्केतोला नजिकै स्लिप खाएर सडक छेउमा अड्किएको हो।

बस अड्किएपछि सडक अवरुद्ध भएको बझाङ प्रहरीले जनाएको छ। दसैँमा घर जान हिँडेका यात्रु बीचमै अलपत्र परेका छन्। बस निकाल्नका लागि स्काभेटर माग गरिएको पत्रकार कल्पना उपाध्यायले बताएकी छन्।

उनका अनुसार गुडिरहेको बसको अगाडिको पत्ता भाँचिएपछि सडकबाट भीरतर्फ मोडिएको थियो। बसमा सामान्य क्षति पुगेको छ भने यात्रु सकुशल छन्। बसमा कति यात्री थिए भन्ने केही खुलेको छैन।