हिमाल प्रेस 
काठमाडौँ- मुख्यमन्त्री नियुक्तिमा सत्तापक्ष र प्रमुख प्रतिपक्षीबीच टकराव बढेसँगै कोशी प्रदेशसभा अधिवेशन अन्त्य भएको छ। मन्त्रिपरिषद्को सिफारिसमा प्रदेश प्रमुख परशुराम खापुङले बुधबार राति १२ बजेदेखि लागु हुने गरी प्रदेश सभा अन्त्य गरेका हुन्।
एमालेले संसद् चल्न नदिने देखिएपछि सरकारले अधिवेशन अन्त्य गर्न सिफारिस गरेको हो। सरकारले बजेटसम्बन्धी अध्यादेश ल्याउने तयारी गरेको छ।
गएको सोमबार मुख्यमन्त्री उद्धव थापाले सभाको अध्यक्षता गरेका इस्राइल मन्सुरीको समेत मत जोडेर विश्वासको मत लिएका थिए। जसको विरोधमा एमालेले आज संसद् अवरुद्ध गरेको थियो । उसले सर्वोच्च अदालतमा पनि रिट दायर गरिसकेको छ।
मुख्यमन्त्री नियुक्ति गैरसंवैधानिक भन्दै एमाले-राप्रपाले बुधबारको सभा बैठक बहिस्कार गरेका थिए। उनीहरूले प्रदेशसभा र मुख्यमन्त्रीलाई गैरसंवैधानिक काम गर्ने छुट नभएको बताएका थिए।
