हिमाल प्रेस 
फाइल तस्बिर।
काठमाडौँ- नक्कली भुटानी शरणार्थी प्रकरणमा पक्राउ परेका १६ जनालाई थप २ दिन हिरासतमा राख्न काठमाडौँ जिल्ला अदालतले अनुमति दिएको छ। पक्राउ परेका पूर्वगृहमन्त्री बालकृष्ण खाँण, एमाले सचिव टोपबहादुर रायमाझीलगायतलाई थुनामा राख्ने म्याद सकिएपछि प्रहरीले उनीहरूलाई सरकारी वकिलको कार्यालय र त्यसपछि काठमाडौँ जिल्ला अदालत लगेको थियो।
सो क्रममा अदालतले थप २ दिन हिरासतमा राख्न अनुमति दिएको हो। यसअघि सोमबार प्रहरीले शरणार्थी प्रकरणमा भएको अनुसन्धानको प्रतिवेदन जिल्ला सरकारी वकिलको कार्यालयमा बुझाएको थियो।
जिल्ला सरकारी वकिलको कार्यालयले बुधबार अदालतमा मुद्दा दर्ता गर्ने तयारी गरेको छ। शरणार्थी प्रकरणमा प्रहरीले बुझाएको अनुसन्धान प्रतिवेदनमा ३२ जनाविरुद्ध मुद्दा चलाउन सिफारिस गरिएको छ।
साथै उनीहरूबाट २७ करोड विगोसहित जरिबाना गर्नुपर्ने प्रतिवेदनमा उल्लेख छ। उक्त प्रकरणमा प्रहरीले पूर्वगृहमन्त्री खाँण, रायमाझी, सचिव टेकनारायण पाण्डेलगायत १६ जनालाई पक्राउ गरी अनुसन्धान गरेको छ।
