हिमाल प्रेस 
डोनाल्ड ट्रम्प। फाइल तस्बिर
काठमाडौँ– अमेरिकी राष्ट्रपति डोनाल्ड ट्रम्पले बुधबार सामाजिक सञ्जालमार्फत इरानलाई कडा चेतावनी दिएका छन्। उनले इरानले सम्झौतासम्बन्धी वार्तामा अत्यधिक समय लगाएको भन्दै अब त्यसको मूल्य चुकाउनुपर्ने चेतावनी दिएका हुन्। यद्यपि उनले इरानले कस्तो मूल्य चुकाउनुपर्ने हो भन्नेबारे स्पष्ट पारेका छैनन्।
यो अभिव्यक्ति त्यतिबेला आएको हो जब अमेरिकाले ओमान नजिक अमेरिकी सेनाको हेलिकोप्टर खसालिएको घटनाको जवाफस्वरूप इरानका विभिन्न लक्ष्यहरूमा आक्रमण गरेको छ। अमेरिकाले उक्त घटनाका लागि इरानलाई जिम्मेवार ठहर गरेको छ। त्यसको प्रत्युत्तरमा इरानले पनि बहराइन, कुवेत र जोर्डनस्थित अमेरिकी सैन्य अड्डाहरूमा आक्रमण गरेको जनाएको छ।
यी घटनाक्रम अप्रिल ८ मा लागू गरिएको युद्धविराम क्रमशः कमजोर बन्दै गएको अवस्थामा भएका हुन्। ट्रम्पको बुधबारको चेतावनीपूर्ण अभिव्यक्ति उनले एक दिनअघि व्यक्त गरेको धारणाभन्दा भिन्न देखिएको छ।
मंगलबार उनले पत्रकारहरूसँग कुरा गर्दै युद्ध अन्त्यका लागि भइरहेको वार्ता अन्तिम चरणमा पुगेको र दुईतीन दिनभित्र निष्कर्षमा पुग्न सक्ने बताएका थिए।
