हिमाल प्रेस 
फाइल तस्बिर : एफपी
काठमाडौँ– संयुक्त राष्ट्रसंघीय महासभाले प्यालेस्टाइन शरणार्थीका लागि संयुक्त राष्ट्रसंघीय राहत तथा कार्य एजेन्सी (यूएनआरडब्लूए) को जनादेश नवीकरणसहित प्यालेस्टाइनको पक्षका प्रस्तावहरूलाई भारी बहुमतले पारित गरेको छ।
प्यालेस्टिनी शरणार्थीहरूलाई सहयोग गर्ने सम्बन्धमा पहिलो प्रस्तावलाई १५१ देशहरूले समर्थन गरेका थिए, भने १० वटा विरुद्धमा र १४ वटा अनुपस्थित थिए। दोस्रो प्रस्ताव, यूएनआरडब्लूएको सञ्चालन र तीन वर्षका लागि नवीकरण गर्ने सम्बन्धमा १४५ देशहरूले समर्थन गरेका थिए, १० वटा विरुद्धमा थिए भने १८ वटा अनुपस्थित थिए।
प्यालेस्टिनी शरणार्थीहरूको सम्पत्ति र यसबाट प्राप्त राजस्व सम्बन्धी तेस्रो प्रस्तावलाई १५७ देशहरूले समर्थन गरेका थिए, १० वटाले विरोध जनाए भने नौ वटा अनुपस्थित थिए।
चौथो प्रस्ताव, प्यालेस्टिनी जनता र कब्जा गरिएका क्षेत्रहरूमा मानव अधिकारलाई असर गर्ने इजरायली अभ्यासको अनुसन्धान गर्ने विशेष समितिको कामको सम्बन्धमा, ८८ वटाले पक्षमा, १९ वटा बिरूद्धमा मतदान गरे भने ६४ वटा अनुपस्थित रहे।
पूर्वी जेरुसेलम र कब्जा गरिएको सिरियाली गोलानसहित कब्जा गरिएको प्यालेस्टिनी क्षेत्रमा इजरायली बस्तीहरू सम्बन्धी, पाँचौँ प्रस्ताव १४६ मत सहित पारित भयो।
यूएनआरडब्लूएका आयुक्त–जनरल फिलिप लाजारिनीले यूएनआरडब्लूएको जनादेशलाई तीन वर्षका लागि नवीकरण गर्न संयुक्त राष्ट्र महासभाले गरेको भारी मतदानलाई स्वागत गर्दै प्रस्तावले प्यालेस्टाइन शरणार्थीहरूसँग विश्वव्यापी ऐक्यबद्धता उजागर गर्ने जनाए।
संयुक्त राष्ट्रका अधिकारीहरुले विज्ञप्ति जारी गर्दै प्रस्तावले प्यालेस्टाइन शरणार्थीहरूको मानवीय र मानव विकासको आवश्यकतालाई समर्थन गर्ने अन्तर्राष्ट्रिय समुदायको जिम्मेवारीको स्वीकृतिलाई प्रतिनिधित्व गर्ने जनाएका छन्।
