मन्त्रीहरूले गरे संघीय संसद् भवनको निरीक्षण

काठमाडौँ- ‘जेनजी’ प्रदर्शनका क्रममा आगलागी भई क्षतिग्रस्त स‌ंघीय संसद् भवन आज (बुधबार) तीन मन्त्रीले निरीक्षण गरेका छन्।

अर्थमन्त्री रामेश्वर खनाल, ऊर्जा, जलस्रोत तथा सिँचाइ, भौतिक योजना तथा यातायात र सहरी विकासमन्त्री कुलमान घिसिङ र गृह तथा कानुनमन्त्री ओमप्रकाश अर्यालले सो भवन निरीक्षण गरेका हुन्।

निरीक्षण गर्दै अर्थमन्त्री खनालले भने, ‘प्रदर्शनकारीको आगजनीबाट क्षतिग्रस्त यो भवन पुरानै स्वरुपमा निर्माण गरिने छ।’ त्यसै गरी मन्त्री घिसिङले आगामी पुससम्म सिंहदरबार परिसरमा निर्माणाधीन संसद् भवन निर्माण सम्पन्न हुने र त्यहीँ संसद्को बैठक बस्ने बताए।

जेनजी प्रदर्शनका क्रममा उक्त भवन पूर्णरुपमा जलेर ध्वस्त भएको छ। प्रदर्शनमा तीन नेपाल प्रहरीसहित मृत्यु हुनेको सङ्ख्या ७३ पुगेको छ।