हिमाल प्रेस 
फाइल तस्बिर ; एपी
काठमाडौँ- इजरायल र सिरिया युद्धविरामका लागि सहमत भएको अमेरिकाले जनाएको छ। अमेरिकी दूतावासले टर्कीबाट वक्तव्य जारी गर्दै पछिल्ला हिंसात्मक घटनापछि दुवै पक्ष युद्धविरामका लागि तयार भएको जनाएको हो।
गएको केही दिनदेखि सिरियाको दक्षिणी सहर सुवैदा आसपास इजरायली र सिरियाली सेनाबीच भिडन्त भइरहेका थिए। आइतबारदेखि सुरू भएको हिंसामा अहिलेसम्म ६ सयभन्दा बढी मानिसको ज्यान गएको बताइएको छ।
यसै सन्दर्भमा इजरायलले यसै साता राजधानी दमास्कसमा हवाई आक्रमण गरेको थियो। साथै सिरियाको दक्षिणी क्षेत्रमा सरकारी बलमाथि उसले आक्रमण गर्दै आएको छ। इजरायलले आफूले सिरियाली ड्रुज समुदायको रक्षा गर्न आक्रमण गरेको दाबी गरेको छ।
यसैबीच सिरियाली राष्ट्रपतिको कार्यालयले दक्षिणी सिरियामा खानाबदोश र ड्रुज लडाकुहरूबीच भइरहेका साम्प्रदायिक झडपहरू रोक्न नयाँ सुरक्षा बल परिचालन गर्ने जनाएको छ।
दुवै पक्षबीच युद्धविरामको सहमति हिंसाको चपेटामा परेका नागरिकहरूका लागि केही राहतको संकेत मानिएको छ। तर, स्थायी शान्तिका लागि अझ गहिरो कूटनीतिक प्रयास आवश्यक देखिन्छ।
