हिमाल प्रेस 
फाइल तस्बिर।
काठमाडौँ- दक्षिण कोरियाले युक्रेनविरूद्धको युद्धमा रूसतर्फबाट लडाइँ गर्ने क्रममा कम्ती सय जना उत्तर कोरियाली सैनिकको मृत्यु भएको दाबी गरेको छ।
दक्षिण कोरियाली सांसद ली सुङ क्वोनले यस्तो दाबी गरेका हुन्। सुङले सञ्चारकर्मीहरूसँग कुरा गर्दै दक्षिण कोरियाली राष्ट्रिय खुफिया सेवाले संसदलाई यो जानकारी दिएको बताएका छन्।
उनका अनुसार युद्धमा हजारभन्दा बढी उत्तर कोरियाली सैनिक घाइते भएका छन्। सांसद सोङले मृत्यु हुनेमा कैयौँ वरिष्ठ सैन्य अधिकारीहरू रहेको बताए।
हालसालै सार्वजनिक भएको एक रिपोर्टमा युक्रेनविरूद्ध १० हजारभन्दा बढी उत्तर कोरियाली सैनिक रूसको तर्फबाट लडाइँ गरिरहेको बताइएको थियो।
सोमबार अमेरिकी रक्षा मन्त्रालय पेन्टागनले पनि युद्धमा उत्तर कोरियाली सैनिकको मृत्यु भएको पुष्टि गरेको थियो। यद्यपि मन्त्रालयले मृत्यु हुने सैनिकको संख्याबारे प्रस्ट पारेको थिएन।
