हिमाल प्रेस 
काठमाडौँ- अभिनेता सौगात मल्ल चलचित्रमा निर्वाह गरेको पात्र र भूमिकाबाट पनि दर्शकमाझ परिचित कलाकारमा पर्छन। कयौँ नाटकमा काम गर्दा प्राप्त गर्न नसकेको अपेक्षाकृत व्यवसायिक सफलता उनले ‘लुट’लगायतका फिल्मबाट पाए।
‘लुट’मा निर्वाह गरेको ‘हाकु काले’को भूमिकाले उनको परिचय नै फेरिदिएको थियो। त्यसैले त अझै पनि उनलाई कयौँ दर्शक अझै हाकुकालैकै नामले पनि चिन्छन्। ‘हाकु काले’ उनलाई ‘मास’मा परिचित गराउने पात्र समेत बन्यो।
त्यसबाहेक फिल्म ‘कागबेनी’, ‘कथा’, ‘फिटकिरी’, ‘बधशाला’लगायतमा गरेको अभिनयले उनलाई उम्दा अभिनेताका रुपमा बलियो गरी स्थापित गरिदियो। मल्लले आकाश अधिकारीद्वारा निर्देशित चलचित्र ‘रणभूमि’ मा पहिलो पटक अभियन गरेका थिए। त्यसपछि फिल्म ‘दाग’, ‘पन्क्षी’ जस्ता फिल्ममा काम गरेका छन्।
फिल्ममार्फत व्यवसायिक सफलता मिले पनि यस क्षेत्रमा उनको जग बलियो बनाउने काम भने रङ्गमञ्चले ग¥यो। उनलाई यहाँसम्म ल्याउन रङ्गमञ्चको भूमिका ठूलो भएको धेरैको भनाइ छ। उहाँलाई अझै पनि रङ्गमञ्चकै कलाकारका रुपमा चिन्नेको जमात पनि ठूलै छ।
रङ्गमञ्चमा लामो समय बिताएका उनले पछिल्लो समय फिल्ममै व्यस्त छन्। त्यसैले त चाहेर पनि रङ्गमञ्चमा फर्कन पाएका छैनन्। यद्यपि रङ्गमञ्चमा फर्कने चाहना भने लामो समयदेखि भएको उनको भनाइ छ। ‘नाटकमा फर्किने योजना बनिरहेको छ। पहिले पनि केही नाटकमा अभिनय गर्ने तयारी नगरेको होइन, तर विविध कारणले त्यो पूरा भएको छैन’, उनले भने, ‘केही साथीसँग फिल्ममा काम गर्ने र त्यसलाई नै नाटकका रुपमासमेत प्रस्तुत गर्ने तयारी पनि भएको थियो।’
पात्रको भूमिकाबाट पनि चर्चा कमाए पनि उनलाई यदाकदा एकै किसिमको भूमिकामा देखिने गरेको आरोप पनि नलागेको होइन। तर उनी भने यसबारे आफू जानकार र सचेत रहे पनि आफूले मेहनतमा कुनै कमजोरी नगरेको बताउनछन्।
‘हामी अभिनेताले हरेक पात्रलाई फरक बनाउने कोसिस गरिरहेका हुन्छौँ। तर, हामीबाट पर्दामा के ल्याउन खोजेको भन्ने विषयमा निर्देशक स्पष्ट हुनुपर्छ। हामीले प्राप्त गरेको पात्रको भूमिका निर्वाह गरिरहेका हुन्छौँ, त्यो के कस्तो हुँदैछ भन्ने निक्र्यौल गर्ने र निर्णय गर्ने पहिलो दर्शक निर्देशक नै हुनुहुन्छ’, अभिनेता मल्लले भने।
लगातार फिल्ममा अभिनय गर्दा आफू पनि पात्रकै जीवन जिउने गरेको पनि उनको अनुभव छ। उनी केही विश्राम गरेर काम गर्न सके नयाँ पात्रमा प्रस्तुत हुनुका साथै अभिनयमा ताजगी ल्याउन सकिने सोचमा छन्।
सोहीअनुसार आगामी दिनमा उनले फिल्ममा काम गर्ने तालिका समेत बनाएका छन्। ‘पात्र तयार गर्न शारीरिकभन्दा पनि मानसिक रुपमा तयार हुनुपर्छ। र, यसका लागि समय चाहिन्छ’, उनले भने, ‘शारीरिक रुपमा तयार हुन समस्या नभए पनि मानसिक रुपमा तयार हुन समय चाहिन्छ।’
उनले पछिल्लो समय अभिनय गरेको चलचित्र ‘अगस्त्य’का लागि २० किलो तौल घटाएर फेरि बढाएका थिए। ‘त्यसका लागि मैले चार महिना अगाडि नै अन्य फिल्मको छायांकनमा खानपिनमा ध्यान दिएँ। तर मलाई मानसिक सन्तुलन गुमाएको व्यक्तिलाई पर्दामा ल्याउन निकै समय लाग्यो’, उनले भने।
लेखिएको पात्रले भोग्ने कथा, रहने परिवेश र आफ्ना भोगाइलाई समावेश गरेर पात्रलाई तयार गर्ने गरेको उनको भनाइ छ। उनलाई पात्रबाट निस्किन समय चाहिन्छ। जसका लागि एउटा काम र अर्कोकामबीच केही समय विश्राम गर्ने तयारी समेत अभिनेता मल्लले गरेका छन्।
