हिमाल प्रेस 
काठमाडौँ- सिद्धार्थ नगरपालिका-८ स्थित नेपाल आयल निगमका ट्यांकरबाट डिजेल निकालिरहेको अवस्थामा तीन वटा ट्यांकरसहित एक जनालाई नियन्त्रणमा लिइएको छ।
मंगलबार नेपाल आयल निगमका ट्यांकरबाट डिजेल निकालिरहेको अवस्थामा करिब ३० लिटर डिजेलसहित तीनवटा ट्यांकर र एक जनालाई नियन्त्रणमा लिइएको हो।
लुम्बिनी प्रदेश प्रहरी कार्यालयबाट खटिएको टोली र वडा प्रहरी कार्यालय भैरहवाको संयुक्त टोलीले ट्यांकरको सिल तोडिएको तथा पेट्रोलियम पदार्थ निकालिरहेको अवस्थामा फेला पारेको थियो।
सो क्रममा दुईवटा ट्यांकर उक्त स्थानमै फेला परेका थिए भने अर्को एक ट्यांकर घटनास्थलबाट भागि फरार भएकोमा प्रहरी टोलीले पछ्याउँदै नियन्त्रणमा लिन सफल भएको हो।
नियन्त्रणमा लिइएका तीनवटै ट्यांकर र एक जना व्यक्तिको सम्बन्धमा थप अनुसन्धान भइरहेको छ।
प्रकाशित: ३० भदौ २०८३ १५:४५ | Tuesday, September 15, 2026
प्रतिक्रिया
