हिमाल प्रेस 
प्रतिनिधिमूलक तस्बिर
पूर्वी डेमोक्रेटिक रिपब्लिक अफ कंगो (डीआरसी)मा ‘एलाइड डेमोक्रेटिक फोर्सेस’ (एडीएफ) ले पछिल्लो ७२ घण्टामा गराएका दुई छुट्टाछुट्टै आक्रमणमा ३२ जना सर्वसाधारणको मृत्यु भएको स्थानीय सञ्चारमाध्यमले शनिबार जनाएका छन्।
संयुक्त राष्ट्रसंघको सहयोगमा डीआरसीमा सञ्चालित रेडियो ओकापीका अनुसार आक्रमण माम्बासा क्षेत्रका गाउँमा भएका हुन्। थप पीडितको खोजी तथा पहिचानकार्य जारी रहेकाले मृतकको संख्या बढ्न सक्ने स्थानीय नागरिक समाजका प्रतिनिधिले बताएका छन्।
आक्रमणपछि प्रभावित गाउँ तथा आसपासका क्षेत्रमा विस्थापनको नयाँ लहर देखिएको छ। थप हिंसाको त्रासमा स्थानीय बासिन्दा सुरक्षित स्थानतर्फ पलायन भएका छन्।
शनिबार अबेरसम्म स्थानीय अधिकारी तथा डीआरसीको सशस्त्र बलले पछिल्ला आक्रमणबारे आधिकारिक प्रतिक्रिया दिएका थिएनन्।
स्थानीय नागरिक समाज संस्थाका अनुसार एडीएफले यस वर्ष मार्चयता माम्बासा क्षेत्रका करिब २० गाउँमा १०० भन्दाबढी मानिसको हत्या गरिसकेको छ।
मध्यअफ्रिकामा इस्लामिक स्टेटसँग आबद्ध एडीएफ युगान्डाको विद्रोही समूह हो। लामो समयदेखि पूर्वी डीआरसीमा सक्रिय रहँदै आएको छ। समूहको गतिविधि नियन्त्रण गर्न तथा त्यसलाई निस्तेज पार्न डीआरसी र युगान्डाका सेनाले सन् २०२१को नोभेम्बरदेखि संयुक्त सैन्य कारबाही सञ्चालन गर्दै आएका छन्।
