स्थानीय तहमै रोजगारी सिर्जना गर्ने योजना बनाएका छौँ : श्रममन्त्री यादव

काठमाडौँ- श्रम, रोजगार तथा सामाजिक सुरक्षामन्त्री रामजी यादवले गैरकानुनी बाटोबाट रोजागरीका लागि विदेश गएका श्रमिकहरू समस्यामा पर्दा राज्यले केही गर्न नसकेको बताएका छन्।

बिहीबार सिंहदरबारमा सबेको प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा उनले यस्तो बताएका हुन्।

मन्त्री यादवले विभिन्न देशमा महिला घरेलु श्रमिकहरू गैरकानुनी बाटोबाट जाने गरेकाले समस्या पर्दा राज्यले केही गर्न नसकेको बताए। उनले पछिल्लो समय युद्धका कारण विदेशमा मृत्यु भएका श्रमिकहरूको शव ल्याउन केही ढिलाइ भएको भन्दै अब भने ढिलाइ नहुने उल्लेख गरे।

मन्त्री यादवले १६ वटा युरोपेली देशसँग श्रम सम्झौता अघि बढाउन परराष्ट्र मन्त्रालयमार्फत पहल गर्न लागिएको बताए। उनले श्रम सम्झौताका लागि मन्त्रालयबाट पहल गर्दा सम्बन्धित देशबाट जवाफ आउन ढिलाइ भएकाले परराष्ट्र मन्त्रालयमार्फत पहल गर्न लागिएको उल्लेख गरे।

उनले अहिले १३ देशसँग मात्रै द्विपक्षीय श्रम सम्झौता भए पनि १७८ देशमा नेपाली श्रमिकहरूको रहेको जानकारी दिए। मन्त्री यादवले वैदेशिक रोजगार प्रक्रियामा भइरहेको आर्थिक ठगी र श्रम शोषण नियन्त्रण गर्ने प्रयास भइरहेको बताए।

उनले श्रमका लागि विभिन्न देशमा जाने नागरिकमध्ये ४८ प्रतिशतले व्यक्तिगत श्रम स्वीकृति लिने गरेको जानकारी दिए। मन्त्री यादवले स्थानीय तहमा नै रोजागरी सिर्जना गर्न मन्त्रालय योजनाका साथ अघि बढिरहेको धारणा राखे।

बैठकमा समिति सदस्यहरुले वैदेशिक रोजगारमा जाने नेपालीहरुलाई ठगिनबाट रोक्नका लागि राज्य गम्भीर भएर लाग्नुपर्ने सुझाव दिएका थिए। बैठकमा समिति सभापति रहबर अन्सारीले मन्त्री यादवलाई समितिको यसअघिको निर्देशन तथा सुझावहरु हस्तान्तरण गरेका थिए।